Regionların inkişafı Prezidentin daimi diqqətindədir

Pərvanə SULTANOVA

pervane525@mail.ru

Prezident İlham Əliyevin Azərbaycanın bölgələrinə mütəmadi səfərləri regionların sosial-iqtisadi inkişafına təkan verməklə yanaşı, aparılan işlərlə yerində tanış olmaq baxımından da mühüm əhəmiyyət daşıyır.

Bu gün həm azad olunmuş ərazilərdə yüksək səviyyədə bərpa-quruculuq işləri aparılır, uzun illərin yurd həsrətindən sonra doğma torpaqlarına qayıdan insanlar üçün layiqli həyat şəraiti təmin edilir, həm də digər bölgələrimizin sosial-iqtisadi inkişafı diqqətdədir, infrastrukturun modernləşməsi, yenilənməsi, yeni müəssisələrin açılması, iş yerlərinin yaradılması istiqamətində ardıcıl işlər davam etdirilir.

Dövlət başçısı regionlara hər səfərində yeni obyektlərin açılışlarında və təməlqoyma mərasimlərində iştirak edir, görülən və həyata keçiriləcək işlərlə yerindəcə tanış olur, tapşırıq və tövsiyələrini verir.

Prezident bununla bağlı bildirib: “Mənim də bölgələrə səfərlərim həm nəzarət üçün bir vasitədir, yəni verdiyim tapşırıqlar necə yerinə yetirilir, eyni zamanda, növbəti tapşırıqlar, tövsiyələr verilir ki, bizim bəyan etdiyimiz bütün hədəflər - ilk növbədə, insanların rifah halının yaxşılaşdırılması, infrastruktur obyektlərinin yaradılması, o cümlədən sosial infrastrukturla bağlı işlərin aparılması bölgələrdə təmin edilsin. Bir sözlə, Azərbaycan bölgələrinin ümumi inkişafı həm sosial xarakter daşıyır, eyni zamanda, ölkəmizi gücləndirir”.

Dövlət başçısının regionlara səfərləri bölgələrin yüksəlişinin davamlı sosial-iqtisadi inkişaf strategiyasının mühüm tərkib hissəsi olduğunu bir daha təsdiqləyir.

Prezident İlham Əliyev oktyabrın 28-də Sabirabad, İmişli, Cəbrayıl və Zəngilan rayonlarına səfər edib. Dövlət başçısı Sabirabad və İmişlidə bir sıra yeni müəssisələrdə olub. Belə ki, Prezident Sabirabad Sənaye Məhəlləsində “Humix” Məhdud Məsuliyyətli Cəmiyyətinin aqrokimyəvi vasitələrin istehsalı müəssisəsinin fəaliyyəti, “Azera Toxumçuluq” Məhdud Məsuliyyətli Cəmiyyətinin toxum istehsalı müəssisəsinin, “Taşobası” Məhdud Məsuliyyətli Cəmiyyətinin pambıq emalı zavodunun, “Fırtına Su Sistemləri” Məhdud Məsuliyyətli Cəmiyyətinin su filtrlərinin istehsalı müəssisəsinin fəaliyyəti ilə tanış olub.

İmişlidə isə “Promalt” Məhdud Məsuliyyətli Cəmiyyətinin arpa emalı müəssisəsinin açılışında iştirak edib.

Dövlət başçısının bu regionlara səfəri bir daha onu göstərir ki, azad edilmiş ərazilərin bərpası prioritet təşkil etsə də, heç bir region dövlətin diqqətindən kənarda qalmır. Məqsəd bütün regionların yüksək inkişafına nail olmaq, vətəndaşlarının rifahının təminidir.

Prezident həmin gün Cəbrayıl rayonunun Horovlu kəndinin birinci mərhələsinin açılışında iştirak edib. Xatırladaq ki, Horovlu kəndi 1993-cü ildə Ermənistan tərəfindən işğal edilmişdi. 2020-ci il oktyabrın 4-də Azərbaycan Ordusu kəndi işğaldan azad edib. Bu kəndin təməlini Prezident İlham Əliyev 2023-cü ilin mayında qoyub. Ümumi sahəsi 248 hektar olan Horovlu kəndində 334 fərdi ev inşa edilib və hər biri müasir kommunikasiya şəbəkəsi ilə təmin olunub.

Dövlət başçısı səfər zamanı Cəbrayıl şəhər məscidinin təməlini qoyub. İşğaldan əvvəl Cəbrayıl rayonunda 5 məscid, 40-dan çox ziyarətgah, 20-dən artıq tarixi-memarlıq abidəsi olub. İşğal dövründə digər ərazilərimizdə olduğu kimi, bu rayondakı tarixi-dini abidələrimiz də ermənilər tərəfindən məhv edilib. Torpaqlarımızın işğaldan azad edilməsindən sonra Qarabağın və Şərqi-Zəngəzurun tarixi-dini və mədəni abidələrinin bərpası, yenilərinin inşası istiqamətində Azərbaycan dövləti tərəfindən mühüm işlər görülüb. Bu xüsusda 2017-ci ildə Cocuq Mərcanlı kəndində inşa edilən, Şuşa məscidinin bənzəri olan məscidi qeyd etmək olar.

Dövlət başçısı, həmçinin Cəbrayıl şəhərində ikinci və üçüncü yaşayış komplekslərinin təməlini qoyub. Hacıqabul-Bəhrəmtəpə-Ermənistan Respublikası ilə dövlət sərhədi avtomobil yolunun 197-ci kilometrindən Cəbrayıl rayonu ərazisində inşa olunan “Şəfəq” Günəş Elektrik Stansiyasına gedən avtomobil yolunun açılışında iştirak edib, eyni zamanda, Cəbrayıl rayonunun Şahvəlli kəndində hər birinin gücü 50 meqavat olan “Şəms” və “Üfüq” Günəş Elektrik stansiyalarının təməlini qoyub.

Prezident Zəngilan rayonunun Ağalı kəndinin 2-ci mərhələsinin və Məmmədbəyli kəndinin açılışlarında iştirak edib. Ağalı kəndinin ikinci mərhələsində istifadəyə veriləcək evlərin sayı 103 ədəddir. Dövlət başçısı azad edilmiş ərazilərə səfərləri zamanı sakinlərlə görüşür, onlara mənzillərinin açarlarını şəxsən təqdim edir. Cəbrayıl rayonunun Horovlu kəndində sakinlərlə görüşən Prezident, kəndə köçən sakinlərə mənzillərin açarlarını təqdim edib. Görüş zamanı ölkə başçısı bildirib ki, Horovlu kəndi Vətən müharibəsinin ilk həftəsində erməni işğalından azad edilib və əslində, bizim Zəfər yürüşümüz bu bölgələrdən başlayıb: “Cəbrayıl, Füzuli istiqamətində irəli gedən bizim əsgər və zabitlərimiz düşmənin bir neçə müdafiə xəttini yara bilmiş, beləliklə, gələcək Zəfər yürüşümüzü şərtləndirmişlər. Allah şəhidlərimizə rəhmət eləsin. Onların əziz xatirəsi daim bizim qəlbimizdə yaşayır, yaşayacaq.

Düz beş il bundan əvvəl bu ərazi işğaldan azad edildi və bu şanlı tarix hər zaman bizim qəlbimizdə yaşayacaq. Bir neçə gündən sonra biz tarixi Zəfərimizin beşinci ildönümünü qeyd edəcəyik. 8 Noyabr - Zəfər Günü bizim tariximizdə olan ən parlaq səhifədir. Beş il bundan əvvəl tarixi Zəfərimiz bütün dünyaya səs salıb.

Azərbaycan xalqı mərd xalqdır, qəhrəman xalqdır, iradəli xalqdır, öz torpağına bağlı olan xalqdır. Biz sübut etdik ki, işğalla barışmaq fikrində deyildik, halbuki bunu dəfələrlə bəyan etmişdik. Döyüş meydanında 300-dən çox şəhər, qəsəbə, kənd azad edildi və Ermənistan kapitulyasiya aktına imza ataraq təslim olmağa məcbur oldu”.

Dövlət başçısı deyib ki, o gündən bu yana quruculuq işləri ilə məşğuluq. Bu gün bütün Qarabağ və Şərqi Zəngəzur tikinti meydançasıdır. Artıq 50 mindən çox insan Qarabağda, Şərqi Zəngəzurda yaşayır, çalışır, təhsil alır: “Onlardan təqribən 20 mini keçmiş köçkünlərdir ki, öz vətəninə, doğma torpağına qayıdıblar. Qalanlar isə müxtəlif işlərdə işləyən vətəndaşlardır. “Böyük Qayıdış”ın əyani sübutu bu gün gözünüzün önündədir. Belə gözəl şərait yaratmaqla Azərbaycan dövləti bir daha öz siyasətini göstərir. İşğal dövründə ovaxtkı köçkünlərlə çoxsaylı görüşlərimdə mən demişdim ki, torpaqlar işğaldan azad olunandan sonra şəhərlərimiz, kəndlərimiz yenidən qurulacaq, əvvəlkindən daha gözəl olacaq. Bugünkü gün bu sözlərin əyani sübutudur. Bu gün sizin həyatınızda yeni dövr başlayır. Siz uzun illər - 30 il ərzində ağır şəraitdə köçkün, qaçqın həyatını yaşamısınız, mənəvi əzablar çəkmisiniz. Xüsusilə işğalın ilk mərhələsində köçkünlərin mütləq əksəriyyəti çadır şəhərciklərində yerləşmişdir. Ona görə bugünkü reallıq, bugünkü gün, o cümlədən ədalətin təntənəsidir. Ədalətə inanmaq və onu təmin etmək lazımdır. Bax, bizim xalqımız həm ədalətə inanıb, həm də onu təmin edib. Bu torpaqların sahibləri bizik. Düşməni öz torpaqlarımızdan qovmuşuq və bu gün gözəl həyat qururuq”.

Prezident İlham Əliyev oktyabrın 28-də Zəngilan rayonunun Məmmədbəyli və Ağalı kəndlərinin sakinləri ilə görüşüb, sakinlərə mənzillərin açarlarını təqdim edib. Ağalı kəndi Böyük Qayıdışın ilk ünvanıdır. Ağalıda "Ağıllı kənd" layihəsinin təməli 2021-ci ilin aprelində dövlət başçısı tərəfindən qoyulub. 2022-ci il iyulun 19-dan etibarən Ağalı kəndinə mərhələlərlə köç başlayıb.

Dövlət başçısı sakinlərlə görüş zamanı bu məqama toxunaraq deyib: “Bu gün “Böyük Qayıdış”ın növbəti mərhələsidir. Bilirsiniz ki, biz “Böyük Qayıdış” Proqramının başlanğıcını da Zəngilan rayonunda qoyduq. Birinci kənd - Ağalı kəndində artıq üç il yarımdır ki, insanlar yaşayır və çox gözəl şərait yaradılmışdır və gözəl də saxlanılır. Mən indi Ağalının içi ilə keçdim və yeni binalarla tanış olarkən gördüm ki, bütün həyətyanı sahələr sanki gözəl bir bağa çevrilib. Biz buranı keçmiş köçkünlərə təhvil verəndə qupquru bir yer idi. Necə ki, indi Məmmədbəyli kəndində də hələ ki, o qədər də çox ağac yoxdur. Ancaq illər keçdikcə vətəndaşlar özləri qurub-yaradırlar, əkib-becərirlər. Dövlət nə lazımdırsa edib, sizi gözəl şəraitlə təmin edib və əminəm ki, siz burada rahat yaşayacaqsınız. Siz buna layiqsiniz”.

Ermənilər 30 ilə yaxın işğal müddətində Azərbaycan ərazilərini viran qoydular, tamamilə dağıtdııar, 9 şəhəri və yüzlərlə kəndi yerlə-yeksan etdilər. İslam dininə məxsus 67 məsciddən 65-ni tam dağıdıb, digərlərində isə donuz saxlamaqla dünya müsəlmanlarını təhqir etdilər. Bu gün Azərbaycan öz doğma torpaqlarını yenidən qurur və bərpa edir. Qısa müddət ərzində Azərbaycanın sıfırdan apardığı işlər miqyasına görə bəlkə də heç bir dövlətin bacarmayacağı işlərdir. Amma təkcə miqyas deyil, eyni zamanda, bütün bərpa-quruculuq işləri yüksək keyfiyyətlə, müasir standartlar tətbiq ediıməklə aparılır. Bu da Azərbaycan vətəndaşı üçün layiqli həyatını təmin etməkdən irəli gəlir.

Dövlət başçısının dediyi kimi, ermənilər dədə-baba torpaqlarımızı viran qoyub, biz isə qurub-yaradan xalqıq: “Biz düşməni torpaqlarımızdan qovmuşuq. İndi də doğma torpağımızda qurub-yaradırıq, şərait yaradırıq, binalar, məscidlər tikirik, tarixi abidələri bərpa edirik. Yəni biz - bu torpaqların sahibləri qayıtmışıq və burada əbədi yaşayacağıq”.

525-ci qəzet 2025.- 30 oktyabr (№198).- S.5.