“Fermerlərin bazara birbaşa çıxış imkanları məhduddur”

"Bu gün fermerlərin üzləşdikləri ən böyük problemlərindən biri onlara bazara birbaşa çıxış imkanlarının olmamasıdır. Sözügedən problem səbəbindən onlar məhsullarını bazara çıxara bilmirlər. Onların bu çarəsiz vəziyyətindən istifadə edən iş adamları fermerlərin yetişdirdiyi məhsulu ucuz qiymətə alıb istehlakçılara daha baha qiymətə satırlar. Yəni, fermerlərlə müqayisədə iş adamları onların məhsulundan daha çox qazanc əldə edir".

Bunu 525.az-a açıqlamasında iqtisadçı ekspert Natiq Cəfərli bildirib. O qeyd edib ki, bu sahədə çalışan minlərlə fermer torpağı becərir, məhsul yetişdirir, amma öz əməyinin qarşılığını layiqincə ala bilmir. Araya girən vasitəçilərin qiymətləri manipulyasiya etməsidir. Nəticədə, fermer ucuz satır, istehlakçı isə baha alır, qazanan isə yalnız alverçi iş adamları olur:

"Fermerlərin istehsal etdiyi məhsul istehlakçıya çatana qədər bir neçə əldən keçir. Bu prosesdə əsasən iri alverçilər, topdansatışçılar və bazar nəzarətçiləri iştirak edir. Fermerlər kənddə məhsulu satmaq məcburiyyətində qalır, çünki məhsulu bazara çatdırmaq üçün nəqliyyat vasitəsi yoxdur".

Sevinc Qarayeva

525-ci qəzet .- 2025.- 5 sentyabr (№ 159).- S.6.