Rusiyada Azərbaycan əleyhinə yeni kampaniya

MƏQSƏD NƏDİR?

Rusiya ərazisindən Azərbaycana qarşı kütləvi şəkildə informasiya kampaniyası başladılıb. Bu barədə Milli Məclisin Xarici müdaxilələrə və hibrid təhdidlərə qarşı komissiyasının bir neçə gün əvvəl yaydığı bəyanatda vurğulanıb. Kütləvi informasiya kampaniyasına Prezident İlham Əliyevin Səudiyyə Ərəbistanının “Əl-Ərəbiyyə” telekanalına müsahibəsi yayılandan dərhal sonra start verilib. Monitorinq zamanı müəyyən olunub ki, aparıcının Zəngəzur dəhlizi ilə bağlı sualına Azərbaycan Prezidentinin tarixi faktlara əsaslanan cavabı kontekstdən çıxarılaraq saxtalaşdırılmış və ya təhrif olunmuş formada rus oxucusuna təqdim edilir: “Rusiya cəmiyyətində antiazərbaycan təbliğatını alovlandırmaq məqsədilə təşkil edilən kampaniya televiziya kanalları və xəbər saytları, sosial media platformaları və müəyyən təsiretmə roluna malik radikal mövqeli şəxslər vasitəsilə aparılır. Kampaniyada Rusiya ərazisində fəaliyyəti qadağan edilmiş və məhdudlaşdırılmış feysbuk, instaqram və “X” kimi platformalardan, habelə digər ölkə vətəndaşlarının adından yaradılan sosial media profillərindən və botlardan da geniş istifadə olunduğu müşahidə edilib. Kampaniyada diqqət çəkən digər bir element isə Azərbaycanın sosial media seqmentinin hədəfli reklamlar vasitəsilə seçilməsi və orada ölkəmizin suverenliyi və ərazi bütövlüyünə qarşı təhdidedici fikirlərin yer almasıdır”.

O da vurğulanıb ki, bu cür ikrah doğuran kampaniyaların Azərbaycanda ictimai rəyə heç bir təsiri yoxdur: “Bu cür fəaliyyətlər yalnız Rusiya cəmiyyətini yalan faktlara söykənərək qızışdırmağa, qonşu dövlətlərlə əsassız düşmənçiliyə sürükləyir. Rusiyanı narahat edən “rusofobiya” sindromunun köklərini “Z” blogerlərin fəaliyyətində axtarmaq lazımdır”.

Göründüyü kimi, Rusiyada Azərbaycana qarşı qaralama, yalan kampaniyasının aparılmasında maraqlı olan qüvvələr var. Bu, əlbəttə ki, bir müddətdir onsuz da soyuqluq yaşanan münasibətlərə daha mənfi təsir göstərir.

Rusiya-Azərbaycan münasibətlərində ötən ilin dekabrında AZAL sərnişin təyyarəsinin vurulmasından sonra müəyyən gərginlik yaranıb. Azərbaycan Moskva qarşısında öz haqlı tələblərini irəli sürüb, qarşı tərəf isə öhdəliklərini icra etməkdən yayınır.

Dövlət başçısı müsahibəsində həmin məqama da toxunaraq vurğulayıb ki, Azərbaycanın mülki təyyarəsinin Rusiya tərəfindən vurulması və Rusiya rəsmilərinin buna reaksiyası ölkəmizdə çox böyük məyusluq və təəssüf doğurdu. Prezident söyləyib ki, təyyarə Rusiyanın hava hücumundan müdafiə sistemi tərəfindən vurulub, ilk növbədə, təyyarənin vurulması baş verməməli idi və bu, faciəvi bir səhv idi.

Eyni zamanda, Prezident müqayisə üçün İkinci Qarabağ müharibəsinin sonuncu günündə baş vermiş helikopter hadisəsinə diqqət çəkib: “Azərbaycan öz sərhədinə yaxınlaşan rus helikopterini təsadüfən vurdu, halbuki o, orada olmalı deyildi. Çünki otuz il ərzində rus helikopterləri Ermənistan ərazisindən Azərbaycan sərhədinə heç vaxt yaxınlaşmamışdı... Həmin gün mən dərhal Rusiya Prezidentinə zəng etdim və üzrxahlığımı bildirdim. Biz həlak olan pilotların ailələrinə və Müdafiə Nazirliyinə dərhal təzminat ödədik. Biz istintaq başlatdıq və bu faciəli səhvə yol verənlər məsuliyyətə cəlb olundular. Lakin Rusiya tərəfindən belə addımların atıldığını görmədik. Beləliklə, noyabrın 9-da baş verən bu faciəli hadisə və davranışımız bizi Azərbaycana qarşı eyni münasibətin sərgilənməsinə hazır etdi, çünki iki ölkə bir-birini dost adlandırır. Bu vaxtadək onlar nəyin baş verdiyini demirlər. Beləliklə, bu, əlbəttə ki, bizim ikitərəfli münasibətlərimizdə ciddi məsələdir, lakin biz əlaqələri gərginləşdirmək istəmirdik”.

Onu da xatırladaq ki, Azərbaycan lideri öz müsahibəsində sülh və əməkdaşlıq mesajları verib, bu müsahibə dünya gündəmində böyük maraqla qarşılanıb və paylaşılıb. Rusiyadakı bəzi dairələrin bu cür yanaşması, informasiya təxribatları isə onların indiyədək apardıqları antiazərbaycan kampaniyasının davamıdır.

Dövlət başçısı Zəngəzur dəhlizini qitələri birləşdirən vacib nəqliyyat əlaqəsi adlandırıb, onun yalnız Azərbaycanın iki hissəsini birləşdirməklə kifayətlənməyəcəyini, həm də Şərq-Qərb və Şimal-Cənub nəqliyyat dəhlizləri üçün yeni imkanlar açdığını söyləyib: “Əslində, Zəngəzur dəhlizi təkcə Şərq-Qərb deyil, həm də Şimal-Cənub nəqliyyat dəhlizi olacaq. Deməli, Rusiyadan Azərbaycana, İrana gedən Şimal-Cənub marşrutundan əlavə, bizim digər marşrutumuz da olacaq - Rusiyadan Azərbaycana, Ermənistana, Naxçıvana və İrana. Beləliklə, düşünürəm ki, bütün region üçün hamının udacağı vəziyyət yaranacaq və heç kim bundan itirməyəcək. Azərbaycan bütün bölgə ölkələri arasında regional əməkdaşlığı gücləndirmək üçün hər şeyi edəcək”.

Azərbaycanın bütün səyləri, təəşəbbüsləri regional əməkdaşlığı, inteqrasiyanı gücləndirməyə, iqtisadi inkişafa, tranzit imkanlarının artırılmasına, sabitliyin, təhlükəsizliyin təmininə yönəlib. Bunun əleyhinə çıxış edənlər heç şübhəsiz ki, regional əməkdaşlığı, inkişafı istəməyənlərdir. Bu baxımdan dövlət başçısının sülhə, əməkdaşlığa yönəlmiş mesajlarını kontekstdən çıxararaq gərginlik yaratmağa çalışanların məqsədləri aydındır.

Bütün bunlar həm də son günlər Rusiya tərəfindən müsbət mesajların verildiyi vaxtda baş verir. Bir neçə sitata diqqət çəkəndə görürük ki, qarayaxma kampaniyasını ilə yanaşı, rəsmilər münasibətlərin yaxşılaşmasına çalışırlar. Xüsusilə bu, iqtisadi sahədə özünü göstərir. Bu günlərdə Rusiya Baş nazirinin müavini Aleksey Overçuk bəyan edib ki, Moskva və Bakı arasında əməkdaşlıq strateji və qarşılıqlı faydalı xarakter daşıyır, hökumətlərarası komissiyalar vasitəsilə əməkdaşlığın inkişafı istiqamətində iş aparılır, iki ölkənin iqtisadi əlaqələr çox yaxşı inkişaf edir, daimi təmaslar saxlanılır. Overçuk, eyni zamanda ŞƏT sammiti zamanı tərəflərin fəal qarşılıqlı fəaliyyət göstərdiklərini, münasibətlərin iqtisadi baxımdan planlaşdırıldığı kimi normal inkişaf etdiyini deyib. Rusiyanın Azərbaycan ilə Ermənistan arasında paraflanmış sazişə “ehtiyatlı nikbin” baxdığını vurğulayaraq, bunu Avrasiya regionunda sülhün möhkəmlənməsinə mühüm töhfə adlandırıb.

Rusiya Prezidenti Vladimir Putin də Moskva-Bakı münsibətləri ilə bağlı danışıb. O bildirib ki, Pekində yapon işğalına qarşı Çin xalq müqaviməti və İkinci Dünya müharibəsində qazanılmış Qələbənin 80-ci ildönümü ilə bağlı keçirilən təntənəli tədbirlərdə Azərbaycan Prezidenti İlham Əliyevlə söhbət edib: “Ölkələr arasında münasibətlərdə “hazırkı vəziyyətə və ya hansısa siyasi vəziyyətə görə həmişə bəzi suallar yaranır və problemlər var. Lakin mən hesab edirəm ki, Azərbaycan ilə Rusiya arasında fundamental münasibətlər və onların inkişafına qarşılıqlı maraq yenə də sonda hər şeyi öz yerinə qoyacaq”.

Rusiya Azərbaycanın əhəmiyyətini bilir, amma təəssüf ki, öz gərginlik yaradan əməllərindən də əl çəkmir. İstənilən halda nəyəsə nail olması da mümkün deyil. Azərbaycan regionda yeni reallıqlar yaradıb, həmin reallıqlar bütün dünya tərəfindən qəbul edilib. Azərbaycan bəyan edib ki, kiminsə diktəsi ilə hərəkət etmir, dövlət ilk növbədə öz maraqlarına uyğun olan addımları atır. Azərbaycan bütün dünyada nüfuzlu, güclü, ədalətli dövlət olaraq qəbul edilir və regionun aparıcı aktorudur. Əgər Moskva həqiqətən əlaqələrin yoluna düşməsini istəyirsə, total kampaniyanı dayandırmalı, üzərinə düşən addımları atmalıdır.

Onu da vurğulayaq ki, son hadisələr bir daha müasir dünyada informasiya təhlükəsizliyinin əhəmiyyətini önə çıxardı. Azərbaycan dövləti illərdir informasiya cəbhəsinin önündədir, özünə qarşı bütün təhdidləri, təzyiqləri dəf etmək gücünə malikdir. Ona görə də bu cür kampaniyalar, cəhdlər nəticə verməyəcək və Moskva gec olmadan düşünməlidir.

Pərvanə

525-ci qəzet .- 2025.- 5 sentyabr (№ 159).- S.5.