UNEC üçün prioritet: milli dildə yüksək keyfiyyətli təhsil modeli

Azərbaycan Dövlət İqtisad Universitetində (UNEC) milli dildə təhsil verən, beynəlxalq standartlara uyğun səriştələrə malik məzunlar yetişdirən keyfiyyətli təhsil modeli tətbiq edilir. Bu model çərçivəsində ana dilində yüksəksəviyyəli təhsil təmin olunmaqla yanaşı, tələbələrin xarici dildə sərbəst ünsiyyət və peşəkar bacarıqlara yiyələnməsi əsas hədəflərdən biri kimi müəyyənləşdirilib.

UNEC rektoru, professor Ədalət Muradov deyir ki, rəhbəri olduğu universitet milli dildə yüksəkkeyfiyyətli təhsil verməklə, tələbələrinin müasir bilik və bacarıqlara yiyələnməsini hədəfləyir: "Məqsədimiz milli dildə təhsili qorumaqla, beynəlxalq təhsil standartlarına uyğunluğu özündə birləşdirən keyfiyyətli təhsil modelini tətbiq etməkdir. Bu yanaşma tələbələrə ana dilində keyfiyyətli təhsil almaqla yanaşı, onların qlobal əmək bazarında rəqabətqabiliyyətli mütəxəssis kimi yetişməsinə zəmin yaradacaq".

Ədalət Muradovun sözlərinə görə, müasir dövrdə seçdiyi sahə üzrə peşəkar mütəxəssis olmaq, uğurlu karyera qurmaq və beynəlxalq əmək imkanlarından faydalanmaq üçün xarici dili, xüsusilə ingilis dilini bilmək artıq zərurətə çevrilib. Bu baxımdan, xarici dilin tədrisi UNEC-də bacarıq kimi deyil, təhsilin ayrılmaz hissəsi kimi qəbul edilib.

Universitetin maddi-texniki bazası müasir tələblərə uyğunlaşdırılıb, keyfiyyətli təhsil mühiti yaradılıb, elmi-tədqiqatların istiqamətləri genişləndirilib. Ölkədə ilk dəfə rəqəmsal universitet modelinə keçid, tədris prosesinin tamamilə rəqəmsallaşdırılması, müəllimlərin reytinqinin müəyyənləşdirilməsi məhz UNEC-də həyata keçirilib. UNEC-də qiymətləndirmə ilə əlaqədar yeni mərhələyə qədəm qoyulub. Bu mərhələdə əsas məqsəd obyektivliyi, şəffaflığı tam təmin etməkdir. İnformasiya və kommunikasiya texnologiyalarının UNEC-də tətbiqi isə təkcə modern təhsilə keçidi deyil, eyni zamanda, idarəetmə sisteminin şəffaflığını təmin edib. Ölkədə ilk dəfə olaraq məhz UNEC-də 7 gün 24 saat fəaliyyət göstərən, eyni zamanda, zəngin fonda malik, müasir resurslarla təchiz edilən elektron kitabxana yaradılıb.

Azərbaycan Dövlət İqtisad Universiteti artıq dünyanın nüfuzlu universitetləri ilə ayaqlaşmaq mərhələsindədir. UNEC Azərbaycan təhsil sistemində və universitet modelinin tanıtımında ciddi yeniliklərə imza atmaqla kifayətlənməyən, öz missiyasını daha irəli götürmək istəyən bir təhsil brendidir.

UNEC sürətli islahatlar aparılan və inkişaf edən Azərbaycan iqtisadiyyatını lazımi kadrlarla təmin edən əsas mənbədir. Son zamanlar müəllim və tələbələrdə öyrətmək və oxumaq həvəslərinin yeni metodlarla müşayiət olunması, universitetin reytinqinin hər il artması ictimaiyyət tərəfindən yüksək dəyərləndirilir.

UNEC-in nüfuzunun günü-gündən daha da artması bu universiteti seçənlərin sayını ildən-ilə artırır. UNEC də təhsil almaq, bu universitetin tələbəsi olmağı hədəfləyənlərin sayı çoxdur. İldən ilə də bu say artır.

UNEC-də təhsilin idarəetməsi sistemi tamamilə rəqəmsallaşdırılıb. Tədrisin təşkilində EDUMAN sistemi tətbiq olunur. Eləcə də 2015-ci ildən sənəd dövriyyəsi kağız daşıyıcılar üzərindən deyil, Elektron Sənəd Dövriyyəsi Sistemi vasitəsilə aparılır. Tədrisin demokratikləşdirilməsi və himanistləşdirilməsi məqsədilə 100 hibrid auditoriya yaradılıb. Tələbələr 53 ixtisas fənni üzrə mühazirə dərslərini istər distant, istərsə ənənəvi formada dinləyə bilərlər. 13 qeyri-ixtisas fənni üzrə isə mühazirələr yalnız distant formada aparılır. Tələbələrin təhsil sənədlərini daha rahat və operativ şəkildə əldə etmələri üçün 2019-cu ildən "Bir Pəncərə Xidməti" fəaliyyətə başlayıb. Bu xidmətin yaradılmasında əsas məqsəd tələbələrə vahid mərkəzə müraciət edərək təhsil haqqında arayışları, transkriptləri, eləcə də digər sənədləri qısa müddətdə əldə etməkdir. Eyni zamanda tələbələrin məmnunluğunu təmin etmək, onların əlavə vaxt itkisinin qarşısını almaq, müraciətlərin idarə olunmasına nəzarəti daha da gücləndirməkdən ibarətdir. "Bir pəncərə" vasitəsilə tələbələr onlara lazım olan təhsil arayışının hazırlanması üçün şəxsi elektron kabinetlərindən günün 24 saatı sistemə müraciət edə bilərlər.

UNEC2B Platformasına əsasən 2017-ci ildən başlayaraq UNEC öz məzunlarına 3 illik zəmanət verir. İşə qəbul edilmiş UNEC məzununun iş prosesində işəgötürən tərəfindən zəif bacarığı aşkarlandığı halda həmin zəif tərəflərin aradan qaldırılması üçün öz vəsaiti hesabına UNEC həmin məzununa əlavə təlim təşkil edir. İşə qəbulla bağlı müsahibədə işəgötürən UNEC tələbəsinin zəif bacarıqlarını aşkarlayarsa, həmin tələbə məzun olana qədər aşkarlanmış zəif bacarıqların aradan qaldırılması üçün UNEC tərəfindən zəruri tədbirlər həyata keçirilir.

Azərbaycan Dövlət İqtisad Universitetində maliyyə ixtisası üzrə təhsil alan, Prezident təqaüdçüsü Şükür Elyazovun sözlərinə görə, UNEC tələbələrə maliyyə sahəsində güclü nəzəri biliklər verməklə yanaşı, ingilis dilində təhsil imkanı da yaradır. Bu, tələbələrin beynəlxalq səviyyədə düşünmə bacarığını artırır: "Bu universiteti seçməyimin əsas səbəbi isə həm yüksək akademik səviyyəsi, həm də gələcəkdə beynəlxalq karyera üçün yaxşı baza yaratmasıdır".

UNEC-də keçirilən imtahan sessiyalarında şəffaflıq hər zaman ön plana çəkilir. İmtahanların obyektiv və ədalətli keçirilməsini təmin etmək, qiymətləndirmədə biliyi yeganə meyar götürmək UNEC-in iş prinsipidir. Bu şəffaflığı qorumaq üçün tətbiq olunan imtahan metodu ildən-ilə daha da təkmilləşdirilir. İmtahan sessiyasının şəffaf təşkilinə dair yeniliklər, müxtəlif layihələr həyata keçirilir. Tətbiq olunan yeniliklərdən biri də yazılı imtahanlarda elektron vasitələrdən istifadə olunmasıdır. Beləliklə də, UNEC yeni texnologiyalarla təhsildə keyfiyyəti artırmağa davam edir.

Tələbələrin məmnunluğunu artırmaq və imtahanlarda şəffaflığı təmin etmək məqsədilə yazılı imtahanları elektronlaşdırdıq. Bu il ilk dəfə olaraq yazılı imtahanlarda elektron vasitələrdən istifadə olunub. Bunun üçün universitetdəki bütün imtahan zallarında xüsusi skayner qurğuları yerləşdirilir. Bu qurğular vasitəsilə tələbələr tərəfindən kağızlarda yazılan imtahan suallarının cavabları kompüterin yaddaşına köçürülür. Məlum olduğu kimi, cavab vərəqlərinin yoxlanılması müəllimlər tərəfindən həyata keçirilir. İmtahan bitən kimi kompüterin yaddaşına köçürülən cavab vərəqlərinin elektron variantı PDF formatında müəllimlərin şəxsi kabinetinə göndərilir. Müəllimlər şəxsi kabinetlərinə daxil olub cavabları elektron formada oxuyub, yoxlayıb qiymətləndirirlər. Beş ayrıca sualın cavabından ibarət olan hər bir cavab fərqli müəllimə göndərilir. Cavab vərəqlərini yoxlayan zaman müəllim bilmir ki, cavablar hansı tələbənindir. Müəllimlər yoxladıqları cavab vərəqinin hansı tələbəyə məxsus olmasından xəbərsiz olurlar. Qiymətləndirmə mərhələsi başa çatandan sonra proqramın köməkliyi ilə o qiymətlər cəmlənir. Artıq tələbə öz şəxsi kabinetində cəm qiyməti görür. Tələbə də bilmir ki, onun cavab vərəqini hansı müəllim yoxlayıb. Proses tamamilə şəffaf şəkildə həyata keçirilir.

UNEC-də imtahan sessiyası zamanı tələbələrə biliklərini nümayiş etdirmək üçün bütün şərait yaradılıb. Onlar da bu şəraitdən yararlanaraq çox sərbəst və rahat şəkildə sualları cavablandırırlar. Tələbələrə, ümumilikdə imtahan prosesinə kənar müdaxilə yoxdur. Yəni imtahanda iştirak edən nəzarətçi və məsul şəxslər yalnız öz vəzifələrini yerinə yetirirlər. İmtahanların gedişatında obyektivlik və şəffaflıq təmin olunur, sessiya normativ sənədlərə uyğun və qərəzsiz keçirilir.

Obyektivliyin və şəffaflığın təmin olunması istiqamətində görülən işlər isə tələbələr tərəfindən yüksək qiymətləndirilir. Prosesin obyektiv və şəffaf keçirilməsi tələbələrdə ruh yüksəkliyi yaradır, biliklərinə düzgün qiymət verildiyi üçün də onlar imtahanlara həvəslə hazırlaşırlar. Tələbələr semestr imtahanlarında nizam-intizamın, şəffaflığın təmin edildiyini, imtahan prosesi zamanı heç bir neqativ halla qarşılaşılmadığını deyirlər. Oxuyan, il boyu hazırlaşan, nizam-intizamlı tələbələr stress, həyəcan, sıxıntı keçirmədən rahat şəkildə imtahana gəlir və sualları cavablandırır, qiymətlərini alırlar. Heç bir kənar müdaxilə və ya hər hansı bir xoşagəlməz halla qarşılaşmadan.

Sevinc QARAYEVA

525-ci qəzetş - 2025.- 11 sentyabr (№162).- S.15.