Müəllim ömrünün sönməyən işığı

"Babək Xubyarov bizim Şabran rayonunda çalışan min nəfərə yaxın müəllimin arasında fərqlənib Əməkdar müəllim adına layiq görülsəydi, əlbəttə, buna təbii baxar, o qədər də heyrətlənməzdim. Ancaq Babək müəllim ölkəmizin paytaxtında - Bakıda minlərlə müəllimin arasında fərqlənərək belə bir ada layiq görülüb. Bu isə olduqca qürurvericidir..." O vaxt Şabran Rayon İcra Hakimiyyətinin başçısı olan hörmətli Novruz Novruzov bu səmimi sözləri Babək müəllimin ünvanına deyəndə 2014-cü ilin dekabrı idi. Və onda Babək müəllimin 60 illik yubileyi təntənə ilə qeyd olunurdu. Azərbaycan təhsilində özünəməsus yer tutan ustad pedaqoq, Əməkdar müəllim, dərsliklər müəllifi Babək Ələkbər oğlu Xubyarovdan söhbət gedir. O, rayonun Qələgah kəndində anadan olmuşdu. Atası Ələkbər müəllimdə pedaqoq idi. Uzun illər rayonun müxtəlif məktəblərində direktor işləmişdi. Əvvəllər onu təkcə bizim Şabran rayonunda hamı tanıyır və sevirdi. Sonralar bütün respublikada tanınan ziyalılardan biri oldu. 1977-ci ildə Azərbaycan Dövlət Universitetinin (indiki BDU) tarix fakültəsini bitirmiş, 22 il Şabranda, 16 ilisə Bakı şəhər 158 №-li tam orta məktəbdə şagirdlərə tarix fənnini tədris etmişdi. Ötən əsrin sonlarında Azərbaycan Dövlət Televiziyası Babək müəllimin şagirdlərindən ibarət "Çıraqqala" komandasının Nəsrəddin Tusi adına bilik yarışlarında ikiqat qalib olmasından bəhs edən "Çıraqqalanın Tusi zirvəsi" adlı bir televiziya filmi də çəkmişdi. Səfəvilər dövlətinin 500 illiyi, Naxçıvan şəhərinin 3500 illiyi, Naxçıvan Muxtar Respublikasının 80 illiyi münasibəti ilə keçirilən bilik yarışlarında Babək Xubyarovun yetirmələri qaliblər sırasında olmuşdular. Babək müəllimin şagirdləri Azərbaycan tarixi fənni üzrə respublika olimpiadalarında fəxri yerlər tutmuşdular. Gənc nəslin təlim-tərbiyəsi ilə yorulmadan məşğul olan Babək Xubyarov da ömrünü bütünlüklə bu ülvi amala həsr etmişdi. O, Təhsil Nazirliyinin, Tələbə Qəbulu üzrə Dövlət Komissiyasının elmi seminar və konfranslarında dəfələrlə dərin məzmunlu məruzə və çıxışlar etmışdi.

Babək Xubyarov Təhsil Nazirliyinin qabaqcıl, təcrübəli bir pedaqoq kimi ona göstərilən etimadına həmişə əməli fəaliyyətilə cavab verərək tarix fənləri üzrə Dövlət Proqramlarının, 7-ci sinif "Orta əsrlər tarixi", 8-ci sinif üzrə "Orta əsrlər tarixi" dərsliklərinin, seçmə fənlər üzrə tarix proqramının, tematik iş planının, müəllimlər üçün coğrafiyadan "1001 test" kitablarının müəllifidir.

Bu dünyada 62 illik bir ömür yaşayan Babək müəllimin insan həyatının, fəaliyyətinin mənası barədə çox dəyərli fikirləri qalıb: O deyirdi: "Mən sınan, inciyən, maneələrdən qorxan adam deyiləm və hər hansı bir çətinlik məni qorxutmur, daha da qüvvətləndirir, güc verir, gücləndirir. O baxımdan özüm bir vaxt görmədiyim qayğını, diqqəti indi ehtiyacı olanlardan əsirgəmirəm".

Onunla yeniyetməlik dövrümüzdə əvvəl sovxozda, sonra çörək zavodunda fəhlə işləmişdik. Tələbəlik dövründən sonra da birgə işlədiyimiz müəllimlik dövrlərindən dostluğumuz daha da möhkəmləndi. Ailəvi dost olduq. Doğma kəndi Qələgahda dünyadan köç edəndən sonra dəfn olunacağı yeri də mənə nişan vermişdi. Bakıda xəstə yatdığı vaxtlarda onu yoluxmağa getmişdim. Rayon təhsil şöbəsinin müdiri Emin Mövsümov (vaxtilə Emin müəllimdə tarix fənninə həvəsi, marağı Babək müəllim oyadıb onu bu sahəyə yönəltmişdi), Şabran şəhər Tofiq Abbasov adına tam orta məktəbin direktoru Fikrət Şamxalov da onun ziyarətinə gəlmişdilər. Xeyli söhbət etdik. Xəstəliyindən, vətəndən, Qarabağdan danışdıq. Onda 2016-cı il yanvar ayının əvvəli idi. Yanvarın 28-i Babək müəllim dünyasını dəyişdi.

Azərbaycan Prezidenti, Ali Baş Komandan cənab İlham Əliyev 27 sentyabr 2020-ci ildə ordumuza düşmən üzərinə əks-hücum əmri verəndə Babək müəllimin yetirməsi Emin Mövsümov və Fikrət Şamxalov da bu müqəddəs müharibədə zəfər qazanmağımız üçün könüllü şəkildə savaşa atıldılar. 44 günlük Vətən müharibəsinin iştirakçısı olan Emin Mövsümov və Fikrət Şamxalov da təltif olunanlar arasındadır. Əfsuslar olsun ki, Babək müəllim Zəfər bayramını görmədi. Ancaq bu Zəfərdən sonra onun işıqlı ruhunun şad olduğuna ürəkdən inanırıq.

Babək müəllimin 4 övladı var. Hamısı alitəhsillidir. Böyük qızı Könül xanım iqtisad elmləri üzrə fəlsəfə doktorudur, İqtisad Universitetində çalışır. İkinci qızı Nərmin xanım Şabran şəhər Roman Yusifov adına 2 saylı tam orta məktəb-liseydə tarix müəllimi işləyir. Üçüncü qızı Pərvin xanım da müəllimədir, Bakı şəhərində çalışır. Oğlu Çingiz isə hərbçi, zabitdir. Zənnimcə, Babək müəllim xoşbəxt idi ki, ata kimi övladlarının sevincini yaşayırdı.

Hələ sağlığında Ramil Ələkbərovun ssenarisi əsasında Ceyhun Şüküroğlu İTV kanalında Babək müəllim haqqında "Azərbaycan müəllimi" adlı sənədli film çəkmişdi. Film dəfələrlə ekranlarda nümayiş olunub. Onun haqqında "Unudulmazlıq imtiyazı" adlı povest-portretin müəllifi isə yazıçı-publisist Aydın Tağıyevdir.

Bu yaxınlarda 70 yaşı tamam olan Babək müəllim, çox heyif ki, 8 ildir, aramızda yoxdur. Lakin onun adı və işıqlı əməlləri əbədiyaşar və unudulmazdır. Bu baxımdan, Mövlana Cəlaləddin Ruminin bir müdrik kəlamını Babək müəllimə də tam mənada aid etmək olar: "Öldükdən sonra məzarımızı yer üzərində axtarmayın! Bizim məzarımız ariflərin qəlbindədir".

Xankərəm ORUCOV,

Təqaüddə olan dil-ədəbiyyat müəllimi

525-ci qəzet .- 2025.- 14 yanvar(№6).- S.12.