“Sərhədsiz yazılar” təqdim olunub

Yanvarın 11-də “Kitabçı” kitab mağazasında yazıçı, publisist Nicat Həşimzadənin “Sərhədsiz yazılar” kitabının təqdimat və imza mərasimi keçirilib.

Tədbirdə Nicat Həşimzadənin pedaqoji fəaliyyətlə məşğul olduğu Azərbaycan Dillər Universitetinin (ADU) rəhbərliyi, tanınmış ədəbiyyatçılar, ictimaiyyət nümayəndələri, tələbələr və jurnalistlər iştirak ediblər.

Təqdimatı giriş sözü ilə açan müəllif tədbir iştirakçılarını və qonaqları salamlayıb, sözə, ədəbiyyata, kitaba göstərdikləri diqqətə görə hər birinə öz təşəkkürünü bildirib. N.Həşimzadə qeyd edib ki, sayca 8-ci kitabı olan “Sərhədsiz yazılar” bir müddət öncə dünyasını dəyişmiş gənc şair Rauf Ranın əziz xatirəsinə həsr olunub.

Daha sonra söz çıxışçılara verilib.

ADU-nun rektor məsləhətçisi Anar Osmanlı çıxışında müəllifi təbrik edib, onun təkcə ədəbiyyatda deyil, pedaqoji fəaliyyətində də uğurlarını nəzərə çatdırıb. A.Osmanlı bildirib ki, N.Həşimzadə bir müəllim kimi öz fənnini böyük sevgi ilə tələbələrinə tədris edir. Bu da tələbələrin ona olan sevgisinin, hörmətinin təməlidir.

Ədəbiyyatşünas tənqidçi, filologiya elmləri doktoru Tehran Əlişanoğlu Nicat Həşimzadənin yaradıcılığı haqqında yüksək fikirlərini səsləndirərək qeyd edib ki, Nicat az yaşına rəğmən ədəbiyyatı dərindən bilən və duyan yazıçıdır. Onun əsərləri ilə bağlı düşüncələrini zaman-zaman məqalələrində qələmə aldığını deyən tənqidçi müəllifin esse yaradıcılığını da yüksək qiymətləndirib, geniş müşahidə və analiz qabiliyyətinin esse yaradıcılığı üçün mühüm meyar olduğunu vurğulayıb.

Əməkdar Mədəniyyət işçisi Müsəllim Həsənov müəllifi yeni kitabı münasibəti ilə təbrik edib, onun qələminin, dəsti-xəttinin müasir ədəbiyyatımızda müsbət mənada fərqləndiyini vurğulayıb.

Yazıçı, publisist, telejurnalist Azər Qismət çıxışında Nicat Həşimzadənin həm bir publisist kimi yaradıcılığına, həm də bir insan kimi şəxsiyyətinə dərindən bələd olduğunu deyərək, onun yorulmaz fəaliyyətinin, sonsuz ədəbiyyat sevgisinin gənclərə örnək olduğunu bildirib.

Şair-esseist, professor Əli Şirin Şükürlü, Əməkdar jurnalist Azad Müzəffərli, ADU-nun Tərcümə fakültəsinin dekanı Bənövşə Məmmədova, yazıçı Kənan Hacı və başqaları çıxış edərək N.Həşimzadənin yaradıcılığı, kitabları haqqında fikirlərini bölüşüb, onu yeni kitabı münasibəti ilə təbrik ediblər.

Qeyd olunub ki, kitabda müəllifin son 7 il ərzində dünya ədəbiyyatı nümunələri, eləcə də müxtəlif mövzularla bağlı yazdığı esselər toplanıb.

“Sərhədsiz yazılar”ın mərhum gənc şair Rauf Raya həsr olunduğunu xatırladan N.Həşimzadə kitabda onun haqqında iki essenin yer aldığını nəzərə çatdırıb. Eyni zamanda müəllif Rauf Ranın ona və özünün də Rauf Raya həsr etdiyi şeirləri oxuyub.

Sonda müəllif qonaqlar üçün kitablarını imzalayıb.

Şahanə MÜŞFİQ

525-ci qəzet .- 2025.- 14 yanvar(№6).- S.9.