Xanəndə Aqil Süleymanov ABŞ-də nüfuzlu mükafata layiq görülüb

Bir müddətdir ABŞ-də yaşayan və fəaliyyət göstərən azərbaycanlı xanəndə Aqil Süleymanov 2025-ci ildə Amerikanın müxtəlif ştatlarında 10-a yaxın musiqi proqramına qatılacaq. Bu barədə sənətçi özü məlumat verib. Bu yaxınlarda sənətçi Onlayn Beynəlxalq Vivaldi Musiqi müsabiqəsində 2 mükafat qazanıb. Belə ki, Aqil Süleymanov vokal sahəsi üzrə "Peşəkar" və "Milli musiqi" kateqoriyalarında 1-ci mükafata layiq görülüb. Qeyd edək ki, xanəndə sözügedən müsabiqəyə ötən il müraciət edib. Yeri gəlmişkən, dahi bəstəkarın xatirəsini yad etmək üçün təsis edilən Vivaldi Beynəlxalq Musiqi Müsabiqəsi onun musiqi irsini və bədii sədaqətini qorumaq məqsədi daşıyır. Qaliblər həmçinin Vivaldi onlayn sosial media platformasında yer almaq imkanı əldə edirlər. Bu, Aqilin mükafat qazandığı sayca 2-ci nüfuzlu beynəlxalq musiqi müsabiqəsidir.

Qeyd edək ki, daha öncə Aqil ABŞ-də təşkil olunan "LIT MUSIC AWARDS" Beynəlxalq Musiqi Festivalında 2 medal qazanıb. Nüfuzlu müsabiqədə "Ninne yarım" mahnısını təqdim edən xanəndəmiz "Ən yaxşı kişi ifaçısı" kateqoriyası üzrə qızıl medala, "Ən yaxşı xalq musiqisi" kateqoriyasında isə gümüş medala layiq görülüb. Belə ki, ilk uğurlarından stimul alan xanəndə onlayn musiqi yarışlarında iştirakını davam etdirməyi düşünür. Onu da qeyd edim ki, azərbaycanlı xanəndə ötən il Zəfər Günü bayramında Nyu-Yorkun böyük musiqi səhnələrindən biri "Linkoln Mərkəzi"ndə Əməkdar artist, professor Nərgiz Əliyarova ilə bir səhnəni bölüşüb. Sənətçi 2025-ci ilin fevral ayından Nyu-Yorkdakı "Hunter Kollec"də master-klass dərslərinə başlamağı planlaşdırır. O, həmçinin professor Corc Mürerlə bərabər, ABŞ-də "Leyli və Məcnun" operasını səhnələşdirmək niyyətindədir.

(Foto: AZƏRTAC, Aqil Süleymanov Nyu-Yorkdakı Linkoln Mərkəzinin Bruno Valter zalında IV Beynəlxalq Bəstəkarlar Müsabiqəsinin qala-konsertində çıxış edir)

Məlumat üçün qeyd edək ki, Aqil Məhəmməd oğlu Süleymanov 1992-ci ildə Cəbrayıl rayonunun Qalacıq kəndində anadan olub. 1993-cü ildə Ermənistanın Azərbaycana təcazüvü nəticəsində ailəsi müvəqqəti olaraq Saatlı rayonunda məskunlaşmağa məcbur olub. 5 ildən sonra isə Bakı şəhərinə köçüblər. Aqil ilk musiqi təhsilini 2001-2004-cü illərdə paytaxtda "28 May" Mədəniyyət Evində alıb. 2005-ci ildən isə təhsilini Bülbül adına Orta İxtisas Musiqi Məktəbində xanəndə, muğam ustası Firuz Səxavətin sinifində davam etdirib. 2011-ci ildə Azərbaycan Milli Konservatoriyasının bakalavr pilləsinə qəbul olunub. Burada Xalq artistləri Səkinə İsmayılova, Mələkxanım Əyyubova və Nəzakət Teymurovadan dərs alıb. 2015-ci ildə Azərbaycan Dövlət Mədəniyyət və İncəsənət Universitetinin magistr pilləsinə qəbul olunub. Burada da Xalq artisti Mələkxanım Əyyubovadan dərs alaraq muğamın sirlərinə yiyələnib. Magistr təhsili ilə yanaşı, Aqil eyni zamanda müəllimlik fəaliyyətinə də həvəs göstərib. O, 2016-cı ildə Müəllimlərin işə qəbulu üzrə müsabiqəsində uğurlu nəticə göstərərək Ağdam Xan Şuşinski adına Uşaq Muğam Musiqi Məktəbinə müəllim vəzifəsinə qəbul olunub. Burada təxminən 1 il yarım pedaqoji fəaliyyətlə məşğul olub.

(Aqil Süleymanov dostları və sənət yoldaşları, tar ifaçısı Rüstəm Müslümov və kamança ifaçısı Elvin Novruzovla tədbirdə)

Aqilin oxumaq həvəsi onu hər zaman yeni yaradıcılıq uğurlarına sövq edirdi. Bu barədə onun özü belə xatırlayır: "2013-cü ildə, Azərbaycan Milli Konservatoriyasının 3-cü kursunda təhsil alırdım, Qlen Dolfi adlı amerikalı musiqi meneceri fransız rejissorla birlikdə Azərbaycana gəlmişdilər. Həmin il Konservatoriyamızda onlar tərəfindən bir neçə videomaterial çəkildi. Hətta Xalq artistləri Alim Qasımov, Natiq Şirinov, Ramiz Quliyev, həmçinin mən də daxil olmaqla bir neçə gənc ifaçıların ifalarını lentə aldılar. Cənab Dolfi dedi ki, videoları Texasda keçirilən populyar musiqi festivalına (South by Southwest) göndərəcək və nəticə yaxşı olsa, məni Amerikaya dəvət edəcək. Belə də oldu... Bir neçə aydan sonra xəbər gəldi ki, sizin ifanızı çox bəyəniblər. Və beləcə Amerikaya gəldik".

(Aqil Süleymanov və amerikalı musiqi meneceri Qlen Dolfi)

(Aqil Süleymanov Xalq artisti Alim Qasımovla bərabər ABŞ-də konsertdə)

Aqil Süleymanovla söhbətimizi burada sonlandırırıq. Həmyerlimizin yeni yaradıcılıq uğurları ilə bağlı növbəti müsahibələrimizdə məlumat vermək ümidi ilə...

525-ci qəzet .- 2025.- 22 yanvar(№11).- S.16.