Cənnət Səlimovanın 85 illiyi qeyd edilib

Azərbaycan Dövlət Milli Gənc Tamaşaçılar Teatrında böyük rejissor, görkəmli sənətkar, Xalq artisti Cənnət Səlimovanın 85 illiyi qeyd olunub.

Teatrdan AZƏRTAC-a bildirilib ki, tədbirdə çıxış edən teatrın direktoru Naidə İsmayılzadə sənətkarı yubiley münasibətilə təbrik edib, onun həyat və yaradıcılığından, Azərbaycan teatrının inkişafındakı xidmətlərindən bəhs edib.

Gecədə professor, Əməkdar İncəsənət Xadimi Məryəm Əlizadə rejissorun teatr xidmətlərindən, pedaqoji fəaliyyətindən ətraflı söz açıb. O bildirib ki, Azərbaycan teatr sənətinin ən parlaq nümayəndəsi kimi Cənnət Səlimova quruluş verdiyi tamaşalarda özünəməxsusluğu ilə seçilib. Onun səhnə əsərləri həm ölkəmizdə, həm də xaricdə böyük uğurlar qazanıb.

Teatr Xadimlər İttifaqının sədri, Xalq artisti Hacı İsmayılov sənətkar haqqında səmimi fikirlər səsləndirib.

Daha sonra Cənnət Səlimova Teatr Xadimlər İttifaqı tərəfindən “Teatr xadimi” qızıl medalı ilə təltif olunub. Sənətkarın həyat və yaradıcılığını əks etdirən mərhum rejissor Aydın Dadaşovun ekranlaşdırdığı “Çağırış” adlı sənədli film və “Hekayəti xırs quldurbasan” tamaşası nümayiş olunub.

525-ci qəzet .- 2025- 29 yanvar(№16).- S.9.