“İrəvanın gizli irsi” beynəlxalq festivalın yarımfinalında

Azərbaycanın CBC telekanalının “İrəvanın gizli irsi” sənədli filmi nüfuzlu beynəlxalq “International Indie Film & Screenplay” (IIFSF) festivalının yarımfinalına vəsiqə qazanıb. Bu festival Böyük Britaniyanın Qlazqo şəhərində hər il keçirilən, bədii, sənədli və qısametrajlı film janrlarında ən yaxşı işləri bir araya gətirən nüfuzlu tədbirdir. Festival dünyanın müxtəlif ölkələrindən müstəqil kinorejissorlar və ssenaristlər üçün platforma təqdim edərək, onlara işlərini daha geniş auditoriyaya və sənaye peşəkarlarına təqdim etmək imkanı verir. IIFSF kino sahəsində təcrübə mübadiləsini və beynəlxalq əməkdaşlığın inkişafını təşviq etmək üçün film nümayişləri və ustad dərsləri təşkil edir. Festival dünyanın hər yerindən filmləri IMDb mükafatlarına namizəd olan yaradıcılar üçün platforma təqdim edir. Festivalın münsiflər heyətinə dünyaşöhrətli kino sənayesi ulduzları, o cümlədən dördqat Qremmi mükafatı laureatı Denni Qlover və üçqat Oskar laureatı Cim Raycel kimi ustalar daxildir.

AZƏRTAC xəbər verir ki, “İrəvanın gizli irsi” filmi erməni tarixinin az tanınan səhifələrinə, İrəvanda Azərbaycan mədəni irsinin sistemli şəkildə məhv edilməsinə həsr olunub. Filmdə nadir arxiv kadrları, yerli sakinlərlə müsahibələr və Təpəbaşı məscidi, Göy məscid və Pənah xanın oğlu Əli xanın evi kimi tarixi yerlərin hazırkı vəziyyəti ilə bağlı kadrlar yer alıb. Film mədəniyyət abidələrinin dağıdılmasının miqyasını nümayiş etdirir və tarixi yaddaşın qorunub saxlanmasına çağırır.

Filmin beynəlxalq platformalarda tanınması münaqişə zonalarında mədəniyyət abidələrinin dağıdılması məsələsini qlobal səviyyəyə qaldırır, diqqəti gələcək nəsillər üçün tarixi irsin qorunmasının zəruriliyinə yönəldir. “İrəvanın gizli irsi”nin festivalın yarımfinalına təqdim olunması filmdə qaldırılan mövzunun dünya ictimaiyyəti üçün əhəmiyyətini vurğulamaqla yanaşı, Azərbaycan kinematoqrafçılarının yüksək peşəkarlığını və məharətini bir daha təsdiqləyir. Onlar üçün bu film sadəcə keçmişin salnaməsi deyil, həm də ədalətin bərpasına və dünya tarixinin bir hissəsi olan mədəni irsin qorunub saxlanmasına çağırışdır.

“İrəvanın gizli irsi”nin “International Indie Film & Screenplay” festivalında yarımfinala çıxması filmin ilk uğuru deyil. 2024-cü ildə müəllif və ssenarist Elşən Rüstəmovun bu əsəri, həmçinin Amsterdamda keçirilən nüfuzlu “Around International” Film Festivalın finalçısı olub. Bundan əlavə, Los-Ancelesdə keçirilən beynəlxalq qısametrajlı filmlər festivalında IndieX Film Fest-də ABŞ, Meksika və Hindistandan olan digər festival iddiaçılarını qabaqlayaraq “İrəvanın gizli irsi” “Ən yaxşı qısametrajlı sənədli film” nominasiyasında qalib olub, həmçinin CBC telekanalının sənədli filmlər üzrə redaktoru Elnarə Məmmədova həmin festivalda “Ən yaxşı montaj” nominasiyası üzrə mükafata layiq görülüb.

525-ci qəzet .- 2025- 29 yanvar(№16).- S.9.