Dünyanı vətənə gətirən azərbaycanlı

Umud Mirzəyev deyəndə mənim ağlıma, hər şeydən əvvəl, onun təsisçisi və prezidenti olduğu, uğruna 33 ilini həsr etdiyi Beynəlxalq Avrasiya Mətbuat Fondu (BAMF) gəlir. Şəhidlər xiyabanı kimi müqəddəs məkanla yan-yana duran BAMF-ın qapısından içəri girəndə qarşımıza yığcam və səliqəli həyətin divarları boyu asılmış, Qarabağ bölgəsinə dair "Mənim evim", "Mənim kəndim", "Mənim şəhərim", "Mənim vətənim" başlıqlı dəyərli fotoqrafiya nümunələri çıxır. Bu şəkillər Umud Mirzəyevin şəxsiyyəti və fəaliyyəti barədə bizə çox şey deyir. Bura şair publisist, jurnalist, ictimai-siyasi xadim Umud Mirzəyevin Evidir desək, yanılmarıq...

BAMF-ın həyətindəki şəkillərə baxıram - xarici ölkələrin nümayəndələri, səfirləri, millət vəkilləri, hətta Baş nazirləri... Mövzular isə Qarabağ, torpaq, mina, şəhid...

Sonra isə onun BAMF-ın 30 illik fəaliyyətinə həsr olunan "Otuz il sülh naminə" kitabını vərəqləyirəm... Və düşünürəm: o, həqiqətən də əsrdə bir yol doğulan insanlardandır.

Ümummilli liderimiz Heydər Əliyevin sözünü xatırlayıram: "Hər bir Azərbaycan gənci hər şeydən çox, hər şeydən artıq müstəqil Azərbaycanın bu günü, gələcəyi haqqında düşünməlidir"... Tarixin min ildən bir yetişdirdiyi dahinin - Ulu öndərin fikirlərində nişan verilən belə Azərbaycan gənclərindən biri də Umud Mirzəyev olub. Ümummilli liderimizin hakimiyyəti zamanında odlu-alovlu gənclik illərini yaşayan qarabağlı - füzulili Umud Mirzəyev sanki illərin necə keçdiyindən xəbərsiz qalıb. Çünki Vətən onun dünəni, bu günü və sabahıdır... Ömrünü bütünlüklə Vətənə həsr edənlərimizin ön sırasında Umud Mirzəyev adı inamla, qürurla çəkilməyə layiqdir.

O, 1982-87-ci illərdə Moskvada, Qorki adına Ədəbiyyat İnstitutunun poeziya şöbəsində təhsil alıb. 1988-ci ildə Azərbaycan Yazıçılar İttifaqının mətbu orqanı olan "Ədəbiyyat və incəsənət" qəzetində əmək fəaliyyətinə başlayıb. 1989-1993-cü illərdə isə həmin qəzetin "Elm, publisistika və məktublar" şöbəsinə rəhbərlik edib.

1992-ci ildən fəaliyyətə başlayan və bu gün BMT-nin İqtisadi-Sosial Şurasının Əsas məşvərətçi statuslu üzvü olan Beynəlxalq Avrasiya Mətbuat Fondunun qurucusu və prezidentidir. Onun təşəbbüsü, eləcə də müxtəlif ölkə jurnalistlərinin dəstəyi ilə yaradılan BAMF davamlı olaraq xarici media nümayəndələrinin postsovet məkanındakı münaqişə bölgələrinə səfərlərinin təşkili və obyektiv informasiyanın yayılması istiqamətində ardıcıl fəaliyyət göstərib.

Qarabağ münaqişəsinin ən mürəkkəb və çətin vaxtlarında xarici ölkələri təmsil edən jurnalistlərin, xalq diplomatlarının cəbhə xəttinə yaxın ərazilərə yüzdən artıq səfərlərini reallaşdıran BAMF, Ermənistan ordusunun törətdiyi cinayətlərlə bağlı obyektiv məlumatların dünya ictimaiyyətinə çatdırılması yolunda ciddi addımlar atıb.

Təvazökar davranışı, yüksək mədəniyyəti ilə fərqlənən şəxsiyyətdir Umud Mirzəyev. Qeyri-səmimi, saxta pafoslu nitqlərlə yox, gördükləri böyük işlərlə, aydın əməllərlə diqqət çəkən, yadda qalan əsl vətənpərvərdir o.

"30 il sülh naminə..."ni oxuyuram... BAMF adından ilk bəyanat, qurumun yaranma zərurəti, fəaliyyət yolu, hətta, demək olar, BAMF özüdür Umud Mirzəyev.

"Mən Sizin bəşəriyyət üçün gördüyünüz təmənnasız işləri dəyərləndirirəm" - bu sözləri BMT-nin baş katibi Pan Gi Mun Beynəlxalq Avrasiya Mətbuat Fondunun prezidenti Ümid Mirzəyev haqqında hələ 2007-ci ildə deyib.

İnsanlığı, ömür yolu və fəaliyyət xəttinə görə sadədən sadədir, həm də yaxşı mənada, mürəkkəbdir Umud Mirzəyevi xarakteri. Bu isə onun tələbkarlığında, iş prosesindəki dəqiqliyində, məsuliyyət və peşəkarlığa son dərəcə önəm verməsində özünü göstərir. Məsuliyyətsizliyi kimsəyə, öz övladlarına belə, bağışlamaz.

Əvvəllər məndən kimsə soruşsaydı ki, "Umud Mirzəyev kimdir", deyərdim ki, sadə bir vətəndaş, çoxsaylı QHT rəhbərlərindən biri...

Bu gün isə deməyə sözüm, yazmağa fikirlərim o qədərdir ki! Maraqlandım, oxudum, araşdırdım, müşahidə etdim və indi-indi tanıyıram Umud Mirzəyevi, onun əsl insan obrazını! O, əməl adamıdır, səmərəsiz çıxışlardansa, konkret işi sevəndir, ona görə də çalışqan insanları ucaldıb başına tac edəndir. Haqlı deyilmi?

Təbiətcə ağayanadır, hadisələrə təmkinlə münasibət bildirər, fikirləri dinləyər, ölçülü-biçili qərarlar verər. Gördüyü işdən zövq alan, bu zövqü ətrafındakılarla paylaşan təşkilat rəhbəridir Umud Mirzəyev. O, başqalarının uğurlarına sevinməyi, həmin uğurların əldə olunmağına dəstək göstərməyi bacaran gerçək ziyalıdır.

Fevralın 1-də Umud Mirzəyev ömrünün daha bir mənalı ili arxada qalacaq. Ad günü münasibətilə onu ürəkdən təbrik edir, Allahın ərməğanı olan ömrünü sağlam və hər anını məzmunlu yaşamasını arzulayıram!

Gülşən BEHBUD

525-ci qəzet .- 2025.- 30 yanvar(№17).-S.8.