Vilnüslə Bakı arasında memorandum imzalandı

SƏNƏDDƏ QARABAĞ MÜNAQİŞƏSİNİN AZƏRBAYCANIN ƏRAZİ BÜTÖVLÜYÜ ÇƏRÇİVƏSİNDƏ HƏLLİ DƏSTƏKLƏNİR

Azərbaycan və Litva Xarici İşlər nazirlikləri arasında daha geniş siyasi dialoqun qurulması üçün memorandum imzalanıb. Bu barədə dünən litvalı həmkarı Viqaudas Uşatskasla görüşdən sonra birgə keçirilən brifinqdə Azərbaycanın xarici işlər naziri Elmar Məmmədyarov məlumat verib. Onun sözlərinə görə, nazirlərin həm təklikdə, həm də geniş tərkibli görüşləri keçirilib. Bu görüşlərdə ilk olaraq Azərbaycanla Litva arasında vəziyyət qiymətləndirilib. E.Məmmədyarov vurğulayıb ki, bu münasibətlər gündən-günə genişlənir. Hər iki ölkə prezidentlərinin də bir neçə dəfə qarşılıqlı səfərləri reallaşıb: "Mən litvalı həmkarımı Azərbaycanda və bölgədəki vəziyyətlə tanış etmişəm. Həmçinin Dağlıq Qarabağ münaqişəsi ilə bağlı ətraflı məlumat vermişəm". Nazir bildirib ki, Avropa Birliyi tərəfindən irəli sürülən "Şərq Tərəfdaşlığı" proqramı ətrafında da fikir mübadiləsi aparılıb. Litva bu proqram çərçivəsində Azərbaycanla daha geniş əlaqələr qurmaq istəyir. Azərbaycan da bunun tərəfdarıdır: "Hesab edirik ki, Avropa İttifaqının bu proqramı həm ölkəmiz, həm də bütünlükdə bölgə üçün əhəmiyyətlidir. Humanitar və iqtisadi baxımdan da əlaqələrimiz inkişaf edir". Nazir dünən iki ölkənin iş adamlarının birgə iştirakı ilə biznes-forumun keçirildiyini də xatırladıb. E.Məmmədyarov daha sonra jurnalistlərin suallarını cavablandırarkən Türkiyə - Ermənistan sərhədlərin açılması ilə bağlı yayılan məlumatlara da münasibətini açıqlayıb. Bildirib ki, artıq Xarici İşlər Nazirliyi bununla bağlı mövqeyini ifadə edib və yeni fikir söyləməyə ehtiyac yoxdur. Nazir Qarabağ münaqişəsinin həlli ilə bağlı Litvanın mövqeyinə də toxunaraq vurğulayıb ki, rəsmi Vilnüs Azərbaycanın ərazi bütövlüyünü dəstəkləyir.

Litvanın xarici işlər naziri Viqaudas Uşatskas deyib ki, bu onun Azərbaycana ilk rəsmi səfəridir. Azərbaycanı bölgədə ölkəsinin əsas ticarət tərəfdaşı adlandıran nazir bildirib ki, dünən Bakıda Litva Ticarət Evi də açılıb: "Bu qurumdan həm biznesmenlər, həm də turistlər yararlana biləcək". V.Uşatskas iki ölkə arasındakı münasibətləri dəyərləndirərək deyib ki, Azərbaycan Avropa üçün yalnız enerji təchizatçısı kimi yox, həm də bölgənin siyasi və mədəni mərkəzi kimi vacibdir: "Mən Azərbaycanın "Şərq Tərəfdaşlığı" proqramında iştirakını müsbət dəyərləndirirəm. Ölkələrimiz arasında bu il parlamentlərarası əməkdaşlıq və korrupsiya ilə mübarizə sahəsində iki iri layihə həyata keçiriləcək".

Qeyd edək ki, imzalanmış memorandumda Dağlıq Qarabağ münaqişəsinin Azərbaycanın ərazi bütövlüyü çərçivəsində həll olunması prinsipi öz əksini tapıb.

Azərbaycana səfəri çərçivəsində V.Uşatskas Fəxri Xiyabanda Heydər Əliyevin məzarını və Şəhidlər Xiyabanını ziyarət edib. Nazir jurnalistlərə açıqlamasında vurğulayıb ki, imzalanmış memorandum Azərbaycanla Litva arasındakı siyasi dialoqu daha da möhkəmləndirəcək. O, bu memorandumun ikitərəfli əlaqələrdə təzə səhifə açacağına inandığını bildirib: "Azərbaycan enerji məsələsində də etibarlı tərəfdaşdır. Mənimlə bərabər Litva biznesmenlərinin böyük qrupu da Bakıya gəlib. Onlar bura ikitərəfli ticarət əlaqələrini yaxşılaşdırmaq niyyəti ilə səfər ediblər. Mən çox şadam ki, Bakının İslam Mədəniyyətinin Paytaxtı elan olunduğu bir ildə bu şəhərə gəlmişəm. Vilnüs də bu il Avropa mədəniyyətinin paytaxtı elan edilib. Biz Azərbaycanla bir yerdə siyasət və iqtisadiyyat, həm də mədəniyyət əlaqələrini yaxşılaşdırmaq istəyirik". Dağlıq Qarabağ münaqişəsinin ancaq sülh yolu ilə həllinin tərəfdarı olduğunu bildirən V.Uşatskas vurğulayıb ki, problemin həlli prosesində Avropa İttifaqının da fəal iştirakını istəyirlər: "İnanırıq ki, bu, Azərbaycanla Ermənistan arasında dialoqun yaxşılaşmasına kömək olacaq".    

P.SULTANOVA

525-ci qəzet.- 2009.- 8 aprel.- S.4.