Mehmet Nuri Güneş: "Obama qərar verəndən sonra Türkiyə Ermənistanla sərhədlərini açacaq"

DTP-li BƏLƏDİYYƏ BAŞÇISINDAN ERMƏNİSTANLA SƏRHƏDLƏRİN AÇILMASINA ETİRAZ EDƏNLƏRƏ XƏBƏRDARLIQ: "BİZ BUNA İMKAN VERMƏYƏCƏYİK"

Türklər demiş, iştə Mehmet Nuri Güneş! O Günəş ki, əhalisinin böyük əksəriyyəti Azərbaycan kökənli olan bir şəhərin - İqdırın kürd kökənli və separatçı ideologiyalı bələdiyyə başçısı seçildi. Bu barədə gələn saylarımızda yazacağıq. Yəqin ki sürpriz nəticənin qəhrəmanı olan və təhlükəli ideologiyaya xidmət edən bir şəxsin Azərbaycanla həmsərhəd və on minlərlə soydaşımızın yaşadığı bir şəhərə rəhbərlik etməsi Azərbaycan üçün yeni fəaliyyət istiqamətini müəyyənləşdirmək üçün əsas olacaq. "525"in müxbirinin Mehmet Nuri Güneşlə müsahibəsi də İqdırın Azərbaycanla bundan sonrakı əlaqələri, eləcə də onun azərbaycanlılarla bağlı fəaliyyəti ətrafındadır.

- İqdır bələdiyyəsinin yeni rəhbəri kimi Azərbaycanla əlaqələrdə nələri vəd edirsiniz?

- Biz mövcud əlaqələri daha çağdaş, insana yaraşan səviyyəyə yaxınlaşdıracağıq. Bu günə qədər İqdırda biryönlü idarəetmə vardı. Biz çağdaş, insana yaraşan, irqçilik qoxumayan, insanı insan kimi görən bir idarəetmə prinsipi ilə işləyəcəyik. İnsana dəyər verən, insanı insan kimi görən, insanı kiçiltməyən bir anlayışla çalışacağıq. Məqsədimiz dostyana əlaqələr qurmaqdır. Bundan təbii nə ola bilər ki?! Bundan öncə necə olduğunu bilmirəm, amma biz əlimizdən gəldiyi qədər daha çağdaş, topluma faydalı olan əlaqələri inkişaf etdirəcəyik.

Mənim babam 118 il əvvəl irqçiliyin üstündən xətt çəkərək azəri ilə evlənib. Nənəm İrəvan xanının qızıdır. Biz irqçiliyi qırmışıq, sizlər isə hələ də yox.

- DTP-nin əhalisinin əksəriyyətinin azərbaycanlılardan ibarət İqdır bələdiyyəsini qazanması Azərbaycanda təəccüblə qarşılanıb. Hətta belə fikirlər də var ki, kürd partiyasının seçkilərdə qələbəsi İqdırda azərbaycanlıların sayının azalmasına və onların İqdırdan köçməsinə səbəb olacaq...

- Bu günə qədər bu işə təpki göstərənlərin bir az özlərinə nəzər salmalarına ehtiyac var. İndiyə qədər İqdırda təkyönlü və sadəcə, özünü düşünən yönətim vardı. Biz isə onlardan daha çağdaşıq, daha çox demokratık, bizim insanlara önəm verən idarəetmə anlayışımız var. Kimsənin narahat olmasına gərək yoxdur. Biz çağdaş düşüncəyə üstünlük verəcəyik. Bizim fəaliyyətimizi izləyib görəcəksiniz.

Bəziləri burda kresloya yiyələnmək, iqtidarda olmaq üçün 80 ildir irqçiliyi rəhbər tutur. Buna heç kim təsir etməyib. İqdırda solçu olub MHP-ləşən insanlar var. Amma onlar utanacaqlar. Bələdiyyə xidmət qapısıdır - biz hər kəsə bərabər hüquqla yanaşacağıq.

- İqdırın həm də Ermənistanla sərhədi var. Sizin Ermənistanla sərhədlərin açılması ilə bağlı düşüncələriniz necədir?

- Bu bizim səlahiyyətimizə aid məsələ deyil. Biz istərdik ki, hər kəs bir-biri ilə dostcasına əlaqələr qursun. Sərhədlərin açarı Obamanın əlindədir - Obama qərar verəndən sonra Türkiyə Ermənistanla sərhədlərini açacaq. Türkiyənin də, Azərbaycanın da açarı Obamanın əlindədir. Şəxsi fikrim isə budur ki, insanlar bir- birinə düşmən olmamalıdır. Biz dostyana əlaqələr qurmaq istəyirik. Bəziləri bu məsələdə xalqı narahat etməyə yönəlmiş fəaliyyət göstərir. Biz buna imkan verməyəcəyik.

- Otağınızda, başınızın üzərində Atatürkün böyük portreti var. Atatürk ideologiyasına münasibətiniz necədir və bu portreti saxlayacaqsınızmı?

- Belə şeyi soruşmaq ayıbdır. Atatürk qurtuluş mücadiləsi verən, hər kəsin qəbul etdiyi dəyərdir.

İlhamə QASIMLI,

İqdır

525-ci qəzet.- 2009.- 10 aprel.- S.7.