Natiq Rəsulzadə: "Mən ədəbiyyata öz mövzumla gəlmişəm"

Azərbaycan Yazıçılar Birliyində tanınmış yazıçı-dramaturq Natiq Rəsulzadənin yubileyilə bağlı tədbir və mədəniyyətşünaslığa dair seminar keçirildi. Seminarın təşkilatçısı kulturoloq, filologiya elmləri namizədi Samirə Mirbağırzadə idi.

Tədbirdə N.Rəsulzadəni təbrik etmək üçün ilk söz Yazıçılar Birliyinin sədri Anara verildi. Yubilyarın şəxsiyyəti və yaradıcılığı haqqında fikirlərini dilə gətirən Anar ona yeni yaradıcılıq uğurları arzuladı.

Birliyin katibi Çingiz Abdullayev N.Rəsulzadənin əsərlərini maraqla oxuduğunu, onunla qələm yoldaşı olmasından qürur hissi duyduğunu vurğuladı.

Sonra seminar çərçivəsində yubilyar yazıçıya suallar ünvanlandı. Rus dilində yazmasının səbəbindən danışan N.Rəsulzadə dedi: "Necə düşünürsənsə, elə də yazırsan. Əgər yazıçı öz yazısını bəyənirsə, əsərləri müəyyən bir auditoriya tərəfindən qəbul edilir, oxunulursa, bu çox yaxşıdır. Əlbəttə, yazıçı istəyər ki, onun əsərlərini daha geniş kütlə oxusun. Mən başqa dillərdə yazmağın tərəfdarıyam. Təki o dildə yazıb-yaradan başqa yazıçıların əsərlərindən aşağı səviyyədə olmasın".

N.Rəsulzadə ədəbi yaradıcılığın mahiyyəti və bu mövzuda digər məsələlər barədə də fikirlərini bölüşdü: "Yazıçının əsas vəzifəsi işığı qaranlıqdan ayırmaqdır. Mən ədəbiyyata öz mövzumla - "cəmiyyətdə balaca yaradıcı insanın yeri" ilə gəlmişəm. Ədəbiyyata ruhən bağlıyam. Ən çətin zamanlarda da ədəbi yaradıcılıqdan əl çəkmədim. Çalışıram ki, qəhrəmanlarım da özümə oxşasın".

Türkan ELÇİNQIZI

525-ci qəzet.- 2009.- 11 aprel.- S.23.