İstanbul şeir festivalında Azərbaycan da təmsil olunur

Aprelin 21-də Türkiyədə IV Beynəlxalq İstanbul Bəyoğlu Şeir Festivalına start verilib. Festivalın Danışma Kurulu üzvü olan Azərbaycan ədəbiyyatı və mədəniyyətinin yorulmaz təbliğatçısı, istedadlı tərcüməçi-yazıçı Yasemin Bayerin verdiyi məlumata görə, builki tədbirə dünyanın 32 ölkəsindən və Türkiyənin müxtəlif şəhərlərindən şairlər qatılıblar. İstanbula gələn 43 əcnəbi şair bu festivalın qonaqları sırasındadır. Festival Dolmabaxça Sarayının Medhal Salonunda təntənəli bir mərasimlə başlayıb.

Aprelin 26-dək davam edəcək IV Beynəlxalq İstanbul Bəyoğlu Şeir Festivalına Azərbaycandan şair Çingiz Əlioğlu dəvət alıb.

Təşkilat Komitəsinin nəşr etdiyi proqrama görə, şair Çingiz Əlioğlu aprelin 22-23-də təşkil olunan ədbirlərdə şeirlərini oxuyacaq.

Ölkələrarası ədəbi və mədəni əlaqələrin inkişaf etməsi naminə bu festivalda bir sıra önəmli addımların atılması, fikir mübadiləsi aparılması nəzərdə tutulub.

Nigar RƏHİMOVA,

Azərbaycan Atatürk Mərkəzinin elmi əməkdaşı

525-ci qəzet.- 2009.- 22 aprel.- S.7.