Görkəmli xanəndə Mütəllim Mütəllimovun 100 illiyi qeyd olunub

Dövlət Muğam Teatrında görkəmli xanəndə Mütəllim Mütəllimovun 100 illik yubileyi münasibətilə təntənəli mərasim keçirilib. Mədəniyyət və Turizm Nazirliyinin dəstəyi ilə təşkil olunan tədbir mərhum xanəndənin lent yazısının səslənməsi ilə başlanılıb. Teatrın direktoru Arif Qazıyev sənətkarın həyatı və yaradıcılığı haqqında danışıb: “Mütəllim Müəllimov musiqimizin nadir səslərindən, təkrarolunmaz muğam ifaçılarından biri, öz dəst-xətti olan unudulmaz xanəndə kimi tanınıb və sevilib”.

Yazıçılar Birliyinin Qarabağ bölməsinin sədri, şair Ənvər Əhməd, akademik Vasim Məmmədəliyev, xalq artistləri Arif Babayev, Habil Əliyev, Alim Qasımov M.Mütəllimovun muğam sənətilə yanaşı, klassik Azərbaycan ədəbiyyatının da bilicisi olduğunu bildirib, yüksək səhnə mədəniyyəti, qeyri-adi səsi haqqında danışıblar.

Teatrın solistləri ustad sənətkarın repertuarına daxil olmuş muğam və təsniflərdən, Azərbaycan xalq musiqisindən, bəstəkar mahnılarından nümunələr ifa ediblər. Tədbir çərçivəsində məşhur muğam ifaçısının keçdiyi həyat və yaradıcılıq yolunu işıqlandıran fotosərgi təşkil olunub. Sonda xanəndənin nəvəsi Mütəllim Mütəllimov tədbir iştirakçılarına və təşkilatçılara minnətdarlığını bildirib.

Mədəniyyət və Turizm Nazirliyindən verilən məlumata görə, görkəmli muğam ifaçısının 100 illik yubileyinə həsr olunan daha bir tədbir Ağcabədi rayonundakı Qarabağ Muğam Mərkəzində keçirilib. Tədbirdə millət vəkili, şair Tahir Rzayev ustad sənətkarın həyat və yaradıcılığından, muğam ifaçılığı sahəsində qazandığı uğurlardan söhbət açıb.

Şair Ənvər Əhməd Qarabağın o cümlədən Ağcabədinin Azərbaycana bəxş etdiyi layiqli övladlar sırasında Mütəllim Mütəllimovun xüsusi yeri olduğunu söyləyib. Rayon icra hakimiyyətinin başçısı Şahin Məmmədov ümummilli lider Heydər Əliyevin mədəniyyət və incəsənət xadimlərinə göstərdiyi diqqət və qayğıdan danışıb, bu siyasətin prezident İlham Əliyev tərəfindən uğurla davam etdirildiyini diqqətə çatdırıb. Ş.Məmmədov Mütəllim Mütəllimovun təkrarsız səsə və orijinal ifa tərzinə malik görkəmli xanəndə kimi tarixə düşdüyünü qeyd edib.

SARA

525-ci qəzet.- 2009.- 22 dekabr.- S.7.