Milli Kitabxanada Puşkinin 210 illiyi qeyd olunub

Ötən gün Mədəniyyət və Turizm Nazirliyinin təşkilatçılığı ilə M.F.Axundov adına Milli Kitabxanada dahi rus şairi A.S.Puşkinin 210 illiyinə həsr olunmuş kitab sərgisi və bədii mərasim keçirilib. Nazirliyin nəşriyyat sektorunun müdiri şair Çingiz Əlioğlu Puşkin yaradıcılığının dünya ədəbi irsində tutduğu yüksək mövqedən danışıb. O, Puşkinin müsəlman dünyasına bəslədiyi rəğbətdən söz açaraq şairin Qurani-Kərimə Tanrı həqiqətlərini bədii dillə ifadə edən kitab kimi yanaşdığını vurğulayıb.

Mədəniyyət və turizm nazirinin müavini Ədalət Vəliyev Puşkini təkcə rus ədəbiyyatının deyil, bütün bəşər mədəniyyətinin əbədiyaşar simalarından biri kimi dəyərləndirib. Puşkinin yaşadığı qısa ömürdə böyük ədəbi- mənəvi irs yaratdığını vurğulayan Ə.Vəliyev belə ədiblərin xatirəsinin əsrlərlə yaşamasının təbii olduğunu qeyd edib: “Çox qısa ömrü yaşayan Puşkin, Səməd Vurğun, Mikayıl Müşfiq, Əhməd Cavad kimi şairlərin tarixə öz imzalarını qoymaları onların bəşər mədəniyyətinə xidmət edən mənəvi irsinin zənginliyindən irəli gəlir. Belə şəxsiyyətlər o qədər işıqlıdırlar ki, ziyaları yüz illər sonra da insanların yolunu işıqlandırmağa, onları öz ideallarının ardınca aparmağa kifayət edir. Zaman dahilərin xeyrinə işləyir. Nə qədər vaxt ötsə də, dahi sənətkarlar sanki bizə daha da yaxınlaşırlar”.

Rusiya səfiri Vladimir Doroxin belə tədbirlərlə hər iki ölkə arasında mədəni əlaqələrin daha da genişlənəcəyinə inamını ifadə edib. Səfir Azərbaycanda rus ədəbiyyatının və mədəniyyətinin sevilməsindən məmnun olduğunu dilə gətirib: “Çox şadam ki, bizim ədəbiyyatımıza, mədəniyyətimizə Azərbaycanda belə sevgi bəsləyirlər, qayğı və diqqətlə yanaşırlar. Puşkin yaradıcılığının Azərbaycan ədəbiyyatının tərkib hissəsinə çevrilməyi buna ən yaxşı sübutdur”.

“Sodrujestvo” Azərbaycanda Yaşayan Xalqların Həmrəyliyi İcmasının sədri Tatyana Kərimova Puşkin kimi şairlərin bütün bəşəriyyət tərəfindən sevilən, qəbul olunan sənətkar olduğunu deyərək, Azərbaycanda onun yaradıcılığına bəslənilən sevgidən söz açıb.

Tədbirdə aktyorlar şairin yaradıcılığından nümunələr oxuyublar.

S.MÜRVƏTQIZI

525-ci qəzet.- 2009.- 22 dekabr.- S.7.