Azərbaycanlı alim BMT-nin “Şərəf və Vicdan” ordeninə layiq görülüb

Bu günlərdə görkəmli patofizioloq alim, professor Sabir Əliyev Birləşmiş Millətlər Təşkilatının (BMT) Beynəlxalq Mükafat Komitəsi tərəfindən elm və tədris sahəsində qazandığı böyük nailiyyətlərə görə Avropa “Şərəf və vicdan” ordeni ilə təltif edilib. Bu barədə qəzetimizə məlumatı Türk Dünyası Araşdırmaları Beynəlxalq Elmlər Akademiyasının (TDABEA) həmsədri professor Elçin İsgəndərzadə verib. Uzun illər Azərbaycan patofizioloqlarının dünya təmsilçilərindən biri olan Prof. S.C.Əliyev 1992-ci ildə “Limfanın element tərkibinin patoloji şəraitdə dəyişməsi və onun korreksiyası” mövzusunda doktorluq dissertasiyası müdafiə edib. Professor S.Əliyev patofizioloqların Bakı, Tiflis və Daşkənddə keçirilən beynəlxalq qurultaylarının nümayəndəsi və təşkilat komitəsinin üzvü olub. Bundan başqa o, İstanbulda, Moskvada, Leninqradda, Kişinyovda, İvano-Frankovskda, Kazanda keçirilən konfrans və simpoziumlarda dəfələrlə elmi məruzələrlə çıxış edib. Elmi əsərləri keçmiş SSRİ-nin bir çox şəhərlərində, o cümlədən ABŞ, Yaponiya, Fransa, İspaniya, İtaliya, Tailand, Türkiyə və başqa ölkələrdə çap olunub. Alim 255 elmi əsərin, 3 dərsliyin, 1 atlas-dərsliyin, 4 dərs vəsaitinin, lüğət kitabçasının, bir neçə tədris-metodik vəsaitinin müəllifidir.

S.MÜRVƏTQIZI

525-ci qəzet.- 2009.- 22 dekabr.- S.7.