Xalq artisti Tariyel Qasımovun 70 illiyi qeyd edilib

Dövlət Gənc Tamaşaçılar Teatrında xalq artisti Tariyel Qasımovun anadan olmasının 70, yaradıcılığının 50 illik yubileyi qeyd edilib. Kinoda və teatr səhnəsində yaratdığı obrazlarla yaddaşlarda öz yerini tutan aktyor Tariyel Qasımovu yubilyarı təbrik etmək üçün səhnəyə aktyorun sənət dostları dəvət olunub. Sənətşünas İlham Rəhimli bildirib ki, T.Qasımov sənəti və istedadlı ilə hər zaman sevilən, xatırlanan aktyordur: “Tariyel Qasımovun oynadığı rollar 100-ü keçib, ancaq 144-ə çatmayıb. Mən inanıram ki, 70 rəqəmi 77 olanda Tariyel bu rəqəmi də tamamlayacaq”.

“Bir az əvvəl burada aktyor ordusu ifadəsi işlədildi. Bəli, aktyorlar var. Hamı aktyorluq edə bilər, şeir deyə bilər. Ancaq əsl aktyor olmaq üçün gərək ruhunda aktyorluq olsun. Ona görə də mən Tariyeli aktyorların aktyoru adlandırıram”. Bu sözləri kinorejissor Tofiq İsmayılov söyləyib.

Xalq artisti Həmidə Ömərovanın da çıxışı yaddaqalan alınıb: “Mən Tariyel Qasımovla cəmisi iki filmdə tərəf-müqabil olmuşam. Arzu edərdim ki, bundan sonra da biz bir filmdə oynayaq. Necə deyərlər, atalar üçdən deyib. Bu arada qeyd edim ki, Tariyel müəllim, sizin çox mənalı baxışlarınız var. Bu sözlər mənim üçün də keçərlidir. Ancaq çox təəssüf ki, kinoda bu baxışlardan yetərincə istifadə olunmayıb”.

Yubilyarı Rus Dram Teatrının baş rejissoru Aleksandr Şarovski, Sumqayıt Teatrının kollektivi adından Valeh Kərimov, Akademik Milli Dram Teatrından Azər Mirzəyev və Cəfər Namiq Kamal, Gənc Tamaşaçılar Teatrının aktyor kollektivi təbrik edib.

Günel MUSAYEVA

525-ci qəzet.- 2009.- 25 dekabr.- S.7.