“Azərbaycan” jurnalının növbəti sayı işıq üzü görüb

Bu günlərdə “Azərbaycan” ədəbi-bədii jurnalının 2009-cu il üçün 11-ci sayı çapdan çıxıb. Jurnalın bu sayı tənqidçi Vaqif Yusiflinin Azərbaycan Yazıçılar Birliyinin 75 illiyinə həsr etdiyi “Sənət məbədimiz” yazısı ilə açılır. Dərginin “Poeziya” bölümündə şairlərdən İslam Sadıq, Bilal Alarlı, Əlihəsən Şirvanlı, Şakir Xanhüseynli, Atif İslamzadə və Sahib Aslanzadənin şeirləri yer alıb. “Yeni tərcümələr” bölümündə Uilyam Somerset Moemin “Sadiq arvad” üçpərdəli komediyası Yaşarın tərcüməsində verilib. Macar şairi Şandor Petefinin jurnaldakı şeirlərini isə Ağasəfa tərcümə edib. Mübariz Cəfərlinin “Əl” povesti və Xumar Ələkbərlinin “İtirilmiş vaxt”, “Vərdiş”, “Xilaskar” hekayələri dərginin “Nəsr” bölümündə əksini tapıb. “Ədəbi gənclik” rubrikasında gənc şairlər Aynur, Xatirə Sadıqova, Fərid, Faiq Hüseynbəyli, Kəramət Böyükçölün şeirləri oxuculara təqdim olunub. “Məmməd İsmayılın 70 yaşı”nda Cavanşir Yusiflinin “Məmməd İsmayılın bəxtinə düşən gün...” yazısı təqdim olunub. “Qəzəl de ki...” yazısı “Dəyirmi masa” bölümündə verilib. Zakir Sadatlının “Gündoğandan günbatana” yazısı “Publisistika” bölümündədir. Jurnalın “Tənqid və ədəbiyyatşünaslıq” rubrikasında Uğurlu Fəxrinin “Nəsrin poetik axtarışları”, Xatirə Quliyevanın “Dünya maarifçi ədəbi estetik fikrinin əsas prinsipləri”, Bəsirə Əzizəliyevanın “Livanın danışan dili” və Sədaqət Həsənovanın “Mikayıl Müşfiq və ədəbi dilimiz” yazıları dərc edilib. Dərginin “Kitablar, rəylər” bölümündə Musa Ələkbərlinin “Yoxuşlar zirvəyə aparır” yazısı yer alıb.

Hüsniyyə İSMƏTQIZI

525-ci qəzet.- 2009.- 31 dekabr.- S.23.