Məmməd Arazın xatirəsi yad edilib

Dünən xalq şairi Məmməd Arazın xatirə günü idi. Bu münasibətlə şairin yaxınları, ailə üzvləri, Məmməd Araz poeziyasının vurğunları Fəxri Xiyabanda şairin məzarını ziyarət etdilər.

Ölümündən beş il keçməsinə baxmayaraq, Məmməd Araz yaradıcılığı indi də oxucuların çox sevdikləri, tez-tez üz tutduqları poeziya xəzinəsidir. Elə yağışlı dekabr günündə çoxsaylı insanların şairin məzarını ziyarət etməsi də bu sevginin bariz təzahürü idi. Millət vəkili, yazıçı-publisist Aqil Abbas Fəxri Xiyabana toplaşanlara təşəkkürünü bildirərək, Məmməd Arazın fiziki yoxluğunun ailəsi, yaxınları tərəfindən hiss olunduğunu, ancaq onun mənəvi ömrünün davam etdiyini söylədi. Aqil Abbas bildirdi ki, Məmməd Araz poeziyası əbədi olaraq Azərbaycan xalqının qəlbinə həkk olunub, onun əsərləri şeirsevərlərin yaddaşında daima yaşayacaq.

Ziyarətə gələnlər şairin məzarı üstünə çiçək dəstələri qoydular.

525-ci qəzet.- 2009.- 2 dekabr.- S.7.