Kinorejissor Fikrət Əliyevin 70 yaşı tamam olur

2009-cu il dekabrın 12-də dəyərli rejissor Fikrət Əliyevin 70 yaşı tamamlanır. 1966-cı ildə “Azərbaycanfilm” kinostudiyasında rejissor asisstenti kimi işə başlayan Fikrət Əliyev quruluşçu rejissor səviyyəsinə yüksəlib və bu gün də fəaliyyətini davam etdirir, O öz yaradıcılığı və dəsti-xətti ilə Azərbaycan kinosunun inkişafında və formalaşmasında xüsusi rola malikdir.

Fikrət Əliyev 12 dekabr 1939-cu ildə Bakı şəhərində anadan olub. 1962-66-cı illərdə İncəsənət institutunda Adil İskəndərovun kursunda, 1971-72-ci illərdə Moskvada Ali rejissor kurslarında təhsil alıb və “Azərbaycanfilm” kinostudiyasına qayıdaraq yaradıcı fəaliyyətini davam etdirib. İlk işi 1972-ci ildə çəkilən, tamaşaçılar arasında rəğbət qazanmış “Baladadaşın məhəbbəti” filmi olub.

“Mozalan” satirik kinojurnalında 20-yə yaxın süjetin müəllifi olan sənətkar, 1981-ci ildə “Qızıl uçurum”, 1986-cı ildə “Qoca palıdın nağılı” 1994-cü ildə “Yuxu,” 2009-cu ildə “Ölüm növbəsi”bədii filmlərinin quruluşçu rejissoru və bir sira sənədli filmlərin rejissoru kimi çalışıb.

İstedadlı sənətkar bir çox filmdə aktyor kimi çəkilib. “Torpaq, Dəniz, Od, Səma” filmində Böyük Murad rolu, “Dəli Kür” filmində Şamxal rolları yaddaqalan obrazlardandır.

2003-2008-ci illərdə Lider TV-nin dublyaj şöbəsində rejissor işləyərək onlarla xarici filmin doğma dilimizə professional səviyyədə dublyajını həyata keçirib.

Onun filmləri Beynəlxalq Festivallarda iştrak edərək bir sıra mükafatlar qazanıb.

Azərbaycanın Əməkdar İncəsənət Xadimi fəxri adına layiq görülmüş Fikrət Əliyev Professional Kinorejissorlar Gildiyasının üzvü olaraq milli kinematoqrafiyanın inkişafında fəal iştirak edən və dostları arasında böyük nüfuza malik olan bir sənətkardır.

Azərbaycan Professional Kinorejissorlar Gildiyasının Bürosu Fikrət Əliyevi dəyərli və əziz həmkar kimi 70 illik yubileyi münasibətilə səmimi qəlbdən təbrik edir, ona möhkəm cansağlığı və daha yüksək yaradıcılıq zirvələri arzulayır.

525-ci qəzet.- 2009.- 12 dekabr.- S.23.