Vaqif Mustafazadənin vəfatının 30 illiyi qeyd olunub

Bakı Caz Mərkəzində (BCM) görkəmli Azərbaycan musiqiçisi, dünya şöhrətli caz ustası Vaqif Mustafazadənin vəfatının 30 illiyinə həsr edilmiş tədbir keçirilib. Gecə Mədəniyyət və Turizm Nazirliyinin və Vaqif Mustafazadə adına Xeyriyyə Fondunun təşkilatçılığı ilə gerçəkləşib. BCM-dan verilən məlumata görə, tədbirdə tanınmış cazmen Rafiq Seyidzadə, sözügedən Xeyriyyə Fondunun direktoru Afaq Əliyeva və başqaları V.Mustafazadənin həyat və yaradıcılıq yoluna nəzər salıb, xatirələrini bölüşüblər: “Vaqif Mustafazadə 1940-cı ildə Bakıda dünyaya gəlib, Bakı Musiqi Məktəbini bitirib. Bir müddət Tbilisidə yaşayıb, bir neçə caz festivalının iştirakçısı olub. Sonralar Bakıya qayıdan Vaqif Mustafazadə “Sevil” vokal instrumental ansamblını yaradıb”.

Çıxış edənlər V.Mustafazadənin qeyri-adi istedada malik sənətkar olduğunu, yaradıcılığında Şərqlə-Qərbin musiqisini böyük ustalıqla birləşdirdiyini önə çəkiblər: “Vaqif Mustafazadə Azərbaycanda caz musiqisini inkişaf etdirib, muğamla cazın uğurlu sintezini yaradıb”.

Mərasimdə V.Mustafazadənin ev muzeyinin əməkdaşları tərəfindən hazırlanmış saytının təqdimatı keçirilib. Azərbaycan, rus və ingilis dillərində hazırlanan saytda musiqi arxivi, məqalələr, fotolar və digər bölümlər var.

Tədbirdə “Sevil” ansamblının üzvü Rəna Talıbovanın və Afaq Əliyevanın iştirakı ilə “Retro-Sevil” ansamblı çıxış edib, mərhum cazmenin əsərləri ifa olunub.

SARA

525-ci qəzet.- 2009.- 18 dekabr.- S.7.