Şair ömrünün yeni töhfəsi

"Sənə məktublarım" istedadlı şair Sabir Abdinovun oxucularla dördüncü görüşüdür. Mən istedadlı sözünü təsadüfən bu yazının əvvəlinə çıxarmadım. Kitabla tanışlıq bu qənaətimi bir qədər də dərinləşdirdi, möhkəmləndirdi. "Sənə məktublarım" şairin həm Vətənə, sevgilisinə, həm də oxucularına poetik məktublarıdır.

Onun qələmə aldıqları ədəbi mühitin maraq dairəsində olan aparıcı yazılarla səsləşmə gücünə və məna yükünə görə də diqqəti cəlb edir, seçilir.

Şairin öz xatirələrinə, ilkinliyinə, doğmalığına və təmizliyinə qayıdışı həm də oxucunu bu ünvana çəkmək, onu özü ilə yol yoldaşı etməkdir. Bu mənada "Məktəb binası" şeiri diqqəti cəlb edir:  

Dünyanın ən həzin,

kövrək nəğməsi

Burda divarlara yazılı qalıb.

Şirin xatirələr qaçır üstümə,

Nisgilim sinəmdən asılı qalıb.

Ana - Vətən paralelliyi ədəbiyyatın əzəli və əbədi mövzularındandır. Bu istiqamətdə də Sabir Abdinovun poetik qənaətləri maraq doğurur, diqqəti çəkir:

Beşiyimdi, yuvamdı

Vətənimin hər daşı.

Bulağımdan içdiyim

Su - anamın göz yaşı.

Və yaxud:

Vətən gözlərimin ağı, qarası,

Ağı yaralıdı, qarası əsir.

Vətən ürəyimin ciyərparası,

 O taylı-bu taylı parası əsir.

Doğma Azərbaycanımızın tale yüklü dərdlərindən olan Qarabağ həsrəti, Qarabağ nisgili də şairin poetik tədqiqatlarının mərkəzində dayanır:

Çeşmələrin qan ağlayır,

Nisgilin daşır, çağlayır,

Dərdin sinəmi dağlayır,

Qarabağım!
   - deyir.

Azərbaycanın dilbər guşələrindən olan Yardımlı dağlarına həsr olunmuş şeirdə "Yurdun qar çiçəyidir Yardımlının dağları" misraları poetik sanbalına görə rəğbət doğurur.

Kənd, şəhər, qürbət, Vətən mövzusu ədəbiyyatın mərhəm mövzularındandır. Amma "Bu şəhər" şeirində şair şəhəri insanlaşdırıb. Ona görə də aşağıdakı misralara laqeyd qalmaq olmur:

Bu şəhər sevgimi aldı əlimdən,

Ondan gözləmirəm daha xoş xəbər.

Səsini, rəngini yaman dəyişib,

Bu axşam onu da boğacaq qəhər.

Sabir Abdinov qələmə aldığı mövzuları ürəklə yazmağı bacaran şairlərdəndir. "Ürəyim" şeirindəki aşağıdakı misralara nəzər yetirək:

 ... Dağları dağladı,

Kükrədi, çağladı,

 Bəxtimə ağladı –

Ürəyim...

Onun şeirləri lirikdir, həzin və musiqiyə yatımlıdır. Elə ona görə də şairin onlarla şeirinə musiqi bəstələnib. Bəstəkarlardan Vüqar Camalzadə və xüsusən Nadir Əzimovla əməkdaşlığı səmərəli olub. Mahnı mətnlərindən danışarkən "Demə, mənə, heç nə demə", "Unut, unut məni, unuda bilsən", "Sənə sözüm var", "Sən yadıma düşəndə" kifayət qədər uğurlu alınıb.

Bəzən yeni kitab haqqında şairin qələm dostlarının, ziyalıların sözü müxtəlif yanaşma təlqin edən adi oxucu rəyindən daha effektli olur. Axı, ziyalı sözü ümumi sənət meyarına daha yaxın səslənir. Bu baxımdan, əməkdar junalist Sahib Əliyevin "İncə duyğular şairi" adlı ön sözünü xüsusi qeyd etmək istəyirəm. Ön söz həm yığcam təhlil, həm də oxuculara bələdçilik nöqteyi-nəzərindən diqqətəlayiqdir.Arzum budur ki, Sabir Abdinovun bu yeni şeirlər toplusu oxucuların, xüsusilə gənclərin stolüstü kitabına çevrilsin.

Mətləb MİSİR

525-ci qəzet.- 2009.-18 fevral.- S.7.