Ofelya Aslan 70 illiyilə bağlı təltif olunub

Mədəniyyət və Turizm Nazirliyi Dövlət Musiqili Komediya Teatrının aktrisası, tanınmış sənətçi, prezident təqaüdçüsü Ofelya Aslanı 70 illik yubileyilə əlaqədar, teatr sahəsindəki xidmətlərinə görə mükafatlandırıb. Bu barədə Nazirliyin mətbuat xidmətindən məlumat verilib.

Bir müddət Dövlət Gənc Tamaşaçılar Teatrında çalışmış aktrisa 1963-cü ildən Dövlət Musiqili Komediya Teatrında xor artisti kimi fəaliyyətə başlayıb. Ofeliya Aslan Azərbaycan Dövlət İncəsənət İnstitutunun "Musiqili komediya aktyorluğu" fakültəsini bitirib, tanınmış aktrisanın ilk yaddaqalan rolu "Durna" komediyasında Lalə obrazı olub. Dəyərli sənətçi "Beş manatlıq gəlin" tamaşasında Gülnaz, "Hicran"da Çarliston, "Arşın mal alan"da Telli, "Bankir adaxlı"da Səmayə, "Axırı yaxşı olar"da Dilbər və başqa rolların öhdəsindən bacarıqla gəlib. Eləcə də bir neçə ekran əsərində - "Yol əhvalatı", "Aktrisanın təbəssümü", "Xoşbəxtlik qayğıları", "Adı sənin, dadı mənim", "Evləri köndələn yar", "Ayrılıq imiş" kimi filmlərdə və teletamaşalarda yaddaqalan obrazlar yaradıb.

Hazırda Musiqili Komediya Teatrında yaradıcılıq fəaliyyətini davam etdirən aktrisa teatrın truppası ilə birlikdə MDB-nin müxtəlif şəhərlərində qastrol səfərlərində olub. O, Rauf Hacıyevin Moskvanın Operetta Teatrında tamaşaya qoyulmuş "Mama, ya jenyus" tamaşasında Bibixanım rolunda uğurla çıxış edib.

S.MÜRVƏTQIZI

525-ci qəzet.- 2009.- fevral.- S.7.