Vətən yolunu nişan verən əbədi poeziya işığı

BƏXTİYAR VAHABZADƏ İTKİSİ LİTVADA DA DƏRİN KƏDƏRLƏ QARŞILANIB

Azərbaycan ədəbiyyatının klassiki, görkəmli elm və mədəniyyət xadimi, mənəvi intibahımızın istinad yeri və millətin ağrı yaddaşı, el ağsaqqalı və xalq şairi Bəxtiyar Vahabzadənin vəfat etməsi haqqında məhzun xəbər uzaq Litvaya da gəlib çatdı və bizi dərindən qüssələndirdi. Müxtəlif millətlərdən olan Litva poeziya həvəskarları onu özünəməxsus üsluba malik bir ustad şair, minillik Azərbaycan poeziyası ənənələrinin layiqli davamçısı, çoxlu şeir və poema kitablarının, dram əsərlərinin müəllifi, həm də Litva şairlərindən Eduardas Mejelaytisin, Alfonsas Maldonisin, Alfonsas Bukontasın və digər yazarların Azərbaycan dilinə gözəl tərcüməçisi kimi tanıyırdılar.

Bəxtiyar Vahabzadənin şeir və qəzəlləri Litva dilinə çevrilib çap edilmişdir. Onun yaradıcılığında həm də Litva mövzusu nəfəs alıb döyünürdü. Ötən əsrin 80-ci illərində bir neçə dəfə Vilnüsdə və Kaunasda olmuşdu. Litva təbiətinin gözəlliyini tərənnüm edən misralar, eləcə də məşhur bəstəkar və rəssam M.K.Çürlyonisin əsərlərinin mövzu və süjetləri əsasında şeirlər yazmışdı. Uzun illər boyu gördüyü ilhamlı işlər sayəsində Azərbaycanda Litvanın, Litvada isə Azərbaycanın adı səslənirdi, bununla da ədəbiyyat, mədəniyyət və incəsənət sahəsində Azərbaycanda qazanılmış bir çox uğurların bu Baltik ölkəsində təqdim olunması üçün əlverişli imkanlar yaradırdı.

O, Litva Azərbaycanlıları Cəmiyyətinin xəttilə də Litva mədəniyyət xadimləri və buradakı qələm qardaşları ilə yaradıcılıq əlaqələri saxlayır, səmimi dostluq münasibətlərini davam etdirirdi. Bununla da yüz illərlə tarixi olan Litva-Azərbaycan ədəbi əlaqələrini genişləndirib gücləndirir, xalqlarımızın mədəniyyətlərarası dialoqunda və qarşılıqlı anlaşma ənənələrinin zənginləşdirilməsində ədəbi uğurlarıyla şəxsən iştirak edirdi. Həm də Azərbaycan-Baltik ədəbi münasibətlərinin inkişafına verdiyi töhfələr timsalında Şərq və Qərb sivilizasiyalarını bir-birinə yaxınlaşdırıb tanıtmaq üçün əvəzsiz işlər görürdü. 2005-ci ildə, anadan olmasının 80 illiyi münasibətilə Litva Respublikasının baş naziri Algirdas Brazauskasın ona ünvanladığı təbrikdə şairin bu sahədə göstərdiyi fəaliyyət və qoyduğu izlər çox səmimi bir minnətdarlıqla qeyd edilmişdi.

Bütün bunlarla bərabər xüsusilə vurğulamaq istərdik ki, Azərbaycan dilinin təmizliyi, millətin bütövlüyü və torpağın bölünməzliyi, milli-mənəvi dəyərlərin qorunub yaşadılması naminə Bəxtiyar Vahabzadənin alovlu bir ehtirasla və böyük fədakarlıqla apardığı mücadilə, milləti özünə tanıtmaq üçün mütəmadi etdiyi açıq və gizli savaşlar onu əbədiyyətə, ölümsüzlüyə qovuşdurdu. Onun zəngin poetik irsinin ürfan və bəsirət işığı xaricdə yaşayan azərbaycanlılara bundan sonra da böyük Vətən yolunu nişan verəcək, nurlu xatirəsi Azərbaycan diasporunun qəlbində hər zaman yaşayacaq.

Dünya ölkələrində yaşayan bütün həmvətənlərlə yanaşı Litva azərbaycanlıları da xalqımıza üz vermiş bu ağır itkidən kədərləndiklərini bildirir, mərhumun ailəsinə və əzizlərinə, Azərbaycan ictimaiyyətinə və şairin qələm qardaşlarına, Bəxtiyar Vahabzadə istedadının milyonlarla pərəstişkarına dərin hüznlə başsağlığı verirlər.

Dərin hörmət və ehtiramla

Mahir HƏMZƏYEV,

Litva Azərbaycanlıları

Cəmiyyətinin sədri,

Litva Respublikası

Hökuməti nəzdində

Milli İcmalar Şurasının

üzvü

525-ci qəzet.- 2009.- 20 fevral.- S.7.