Naxçıvanksi adına Hərbi Liseydə ədəbi görüş təşkil edilib

Azərbaycan Yazıçılar Birliyinin Ədəbiyyatı Təbliğ və Müəllif Hüquqları Bürosu bugünlərdə Cəmşid Naxçıvanski adına Hərbi Liseydə şair Nazim Əhmədli və şairə Fərqanə Mehdiyeva ilə görüş keçirib. Zabit heyətinin və tələbələrin iştirak etdiyi tədbiri Hərbi Litseyin tərbiyəvi işlər üzrə bölmə rəisi, polkovnik-leytenant Elşad Əliyev açaraq, gənclərin milli mənəvi tərbiyəsində ədəbiyyatın danılmaz rolu olduğunu vurğulayıb.

Büronun direktoru, şair Nazim Əhmədli müasir Azərbaycan ədəbiyyatından, çağdaş poeziyanın inkişaf meyllərindən danışıb. Şair son illər Azərbaycan torpaqlarına erməni işğalçılarının təcavüzü haqqında, Qarabağ mövzusunda xeyli əsərlər yazıldığını vurğulayıb. Liseyin müdavimlərinin gələcəyin zabitləri, Vətənimizin müdafiəçiləri və ədəbi əsərlərin qəhrəmanları olduğunu diqqətə çatdıran N.Əhmədli yeni şeirlərini səsləndirib. "Ulduz" jurnalının əməkdaşı şairə Fərqanə Mehdiyeva da ədəbiyyatın inkişafı barədə fikirlərini söyləyib. Daha sonra şairlər tələbələrin onlara ünvanladıqları sualları cavablandırıblar. Tədbirin sonunda hər iki şairə Hərbi Litseyinin rəhbərliyi tərəfindən fəxri fərman təqdim edilib.

ARİFƏ

525-ci qəzet.- 2009.- 21 fevral.- S.26.