"Xocalı - vəhşi əsrin vəhşi əsəri" çapdan çıxıb

Bugünlərdə "Qanun" nəşriyyatında publisist Kərim Kərimlinin "Xocalı - vəhşi əsrin vəhşi əsəri" kitabı işıq üzü görüb. Kitab dünyanın nüfuzlu nəşrlərindən olan "İzvestiya", "Valer aktyuel", "Le Mond" "Krua İeveneman", "Sunday Times", "Vaşinqton post", "Times" kimi qəzet və jurnallarda Xocalı faciəsi haqqında yazılmış məqalələrdən sitatlarla açılır. Kitaba toplanmış, faktlara əsaslanan məqalələrdə müəllifin publisistik düşüncələri ilə yanaşı, Xocalı faciəsi şahidlərinin dedikləri də əsas götürülüb. Şahidlərdən Zahid Cabbarov, Cəmil Məmmədov, Vüqar Nəcəfov, Əntiqə Qəhrəmanova, Rahilə Hacıyeva, Elmira Allaherdiyeva, Rafiq Hüseynov və başqalarının nəql etdiyi hadisələr burada yer alıb. Xüsusi amansızlıqla və əziyyətlə öldürülənlərin siyahısı da nəşrə daxil edilib.

Müəllif kitabın yazılma səbəblərini açıqlayaraq soyqırımı törədənlərin ədalət məhkəməsinə çəkilməsi arzusunu ifadə edib: "Biz Xocalı qırğınını qisasçılıq məqsədilə yadda saxlamırıq, biz Xocalıda, xocalılara qarşı törədilənlərə görə intiqama çağırmırıq və dünya ictimaiyyətindən, beynəlxalq təşkilatlardan da bunu tələb etmirik. Biz dünyadan Xocalı qətliamına görə obyektiv qiymət və ədalətli mühakimə istəyirik!"

Kitab Demokratik İslahatlar Partiyasının və yazıçı, millət vəkili Aqil Abbasın maddi dəstəyi ilə çap olunub. Xatırladaq ki, sözügedən kitab K.Kərimlinin oxucularla beşinci görüşüdür. Əsasən Qarabağ dərdlərini qələmə alan publisistin indiyədək "Ürəyimin şüşəsi - Şuşa", "Hələ şuşalıykən", "Qəlbimizdə bir ad yaşar" və "Şuşalı, Şuşasız günlərim" kitabları nəşr olunub.

Sevinc MÜRVƏTQIZI

525-ci qəzet.-2009.-26 fevral.-S.7.