"Göygöl" ansamblı 40 yaşını tamamladı

Gəncə şəhərində Göygöl Dövlət Mahnı və Rəqs ansamblının 40 illik yubileyi qeyd olunub. Ansambldan verilən məlumata görə yubiley tədbiri ansamblın kollektivinin Heydər Əliyevin abidəsini ziyarət etməsi ilə başlayıb. Daha sonra tədbirdə xalq artisti Şahnaz Haşımova Göygöl Mahnı və Rəqs ansamblının yaradılma tarixindən bəhs edib: " Ansambl 1969-cu ildə əməkdar artist, tarzən Fikrət Verdiyevin rəhbərliyi ilə yaradılıb. 40 il ərzində ansambl xalqın rəğbətini qazanıb, alqışlarla mükafatlandırılıb. Ansamblın qazandığı uğurlar təkcə ölkə sərhədləri ilə məhdudlaşmayıb.

Ansamblımız Türkiyə, ABŞ, Kanada, Almaniya, Macarıstan kimi dünyanın bir çox ölkəsində qastrol səfərlərində olub, Azərbaycan mədəniyyətini layiqincə təmsil edib və uğur qazanıb".

Xalq artisti həmçinin ötən il yaradıcı kollektivin qonşu Gürcüstanda verdiyi konsertdən söz açıb: " Ansamblımızın çıxışı həm soydaşlarımız, həm də qonşu xalq tərəfindən alqışlarla qarşılanıb". Ş. Haşımova bu il yaradıcı üçün heyətin Dağıstana səfərinin nəzərdə tutulduğunu qeyd edib.

S.MÜRVƏTQIZI

525-ci qəzet.-2009.- 26 fevral.-S.7.