Xocalı faciəsinin qurbanları silsilə tədbirlərlə anılıb

Xocalı faciəsinin qurbanları paytaxtın bir çox yerlərində yad edilir. C.Cabbarlı adına Respublika Gənclər Kitabxanasında faciənin 17-ci ildönümünə həsr olunmuş "Qan yaddaşı Xocalı" adı dəyirmi masa keçirilib. Tədbirdə kitabxanaçılar, Xocalı faciəsinin şahidləri, Bakı Dövlət Universitetinin tələbələri iştirak ediblər.

Tədbiri giriş sözü ilə direktor Tahir Sadıqov açaraq XX əsrin ən qanlı faciələrindən olan Xocalı hadisəsi haqqında danışıb və bu qırğının erməni millətçiləri tərəfindən Azərbaycan xalqına qarşı törədilmiş növbəti soyqırım olduğunu qeyd edib.

Xocalı sakini, o dəhşətli faciədə doğmalarını itirmiş Bahar Əsədova insanlığa zidd olan bu soyqırımı unutmağa heç bir Azərbaycan vətəndaşının haqqı olmadığını bildirib.

Tədbirin sonunda "Unudulmaz tarix, unudulmaz faciə" adlı fotostend nümayiş etdirilib.

Nəriman Nərimanovun ev-muzeyində isə Xocalı soyqırımının ildönümünə həsr olunmuş "Xocalı qan yaddaşımızdır" adlı tədbir keçirilib.

"Günay" Uşaq Teatrının, "Aytam" Uşaqların Mədəni Maarifləndirilməsi İctimai Birliyinin və Muzeyin birgə təşkilatçılığı ilə keçirilən tədbirdə Ermənistan silahlı qüvvələrinin Xocalıda silahsız insanlara, uşaqlara və qocalara qarşı törətdiyi, dünyada bənzəri olmayan qəddarlıqdan söz açılıb.

Tədbirdə "Günay" Uşaq Teatrının ifasında şairə Zərəngiz Dəmirçi Qayalının "Cavab ver" poeması əsasında hazırlanmış eyniadlı tamaşa təqdim olunub.

S.MÜRVƏTQIZI

525-ci qəzet.-2009.- 26 fevral.- S.7.