Xocalı soyqırımı qurbanlarını kitabxanaçılar da yad ediblər

Gəncə şəhər Mərkəzi Kitabxanasında 26 fevral Xocalı soyqırımına həsr olunmuş "Bir gecənin qanla yaşanmış tarixi" adlı anım mərasimi keçirilib. Anım mərasimini giriş sözü ilə açan Gəncə şəhər mərkəzi kitabxanasının direktoru Elmira Əliyeva Xocalı faciəsi və onun acı nəticələri haqqında danışaraq öz çıxışında ümummilli lider Heydər Əliyevin "Azərbaycan xalqına qarşı yönəldilmiş Xocalı soyqırımı öz ağlasığmaz qəddarlığı və qeyri-insani cəza üsulları ilə bəşər tarixində tayı-bərabəri olmayan bir vəhşilik aktıdır" fikrinə istinad edib. Bu soyqırımın bütün bəşəriyyətə qarşı tarixi bir cinayət olduğunu qeyd edən E.Əliyeva Xocalı faciəsinin mahiyyətinin bütün dünya xalqlarına çatdırılmasının vacibliyini dilə gətirib.

Tədbirdə Xocalı faciəsinə həsr olunmuş şeirlər səsləndirilib, Gəncə uşaq rəssamlıq məktəbi şagirdlərinin və 2 saylı orta məktəbin 5-ci sinif şagirdi Ruslan Dəmirovun soyqırıma aid rəsmləri sərgilənib.

Sonda Heydər Əliyev Fondu ilə Gənclər və İdman Nazirliyinin birgə hazırladığı "Ermənisayağı həqiqətlər və ya qondarma erməni soyqırımı" adlı film nümayiş etdirilib.

Gəncə, Şəki, Şirvan, Neftçala, Xaçmaz kitabxanalarında da Xocalı soyqırımı ilə əlaqədar tədbirlər keçirilib. Tədbirlərin iştirakçıları Xocalı faciəsinin tariximizin ən qanlı səhifələrindən olduğu, erməni quldurların xalqımızın başına gətirdikləri müsibətlərin unudulmamasının, bütün dünyada geniş təbliğinin zəruriliyi vurğulanıb.

Sevinc MÜRVƏTQIZI

525-ci qəzet.-2009.- 27 fevral.-S.7.