Sumqayıt sənətkarları "Xəzərin rəngləri"ni təqdim edir

Muzey Mərkəzində Sumqayıt rəssamları və xalq tətbiqi sənəti ustalarının işlərindən ibarət "Xəzərin rəngləri" mövzusunda sərginin açılış mərasimi keçirilib. Mədəniyyət və Turizm Nazirliyinin Sumqayıt şəhər icra hakimiyyəti ilə birlikdə təşkil etdiyi sərgi şəhərin 60 illik yubileyinə həsr olunmuş bayram tədbirləri çərçivəsində açılıb.

Açılış mərasimində çıxış edən şəhər icra hakimiyyətinin başçısı Vaqif Əliyev Sumqayıtın inkişafında ümummilli lider Heydər Əliyevin rolunu xüsusi vurğulayaraq, şəhərin tarixinin yarısından çoxunun bu görkəmli dövlət xadiminin adı ilə bağlı olduğunu qeyd edib. İcra başçısı prezident İlham Əliyevin Sumqayıtın 60 illik yubileyinin qeyd edilməsi barədə imzaladığı sərəncamın sumqayıtlılar tərəfindən məmnunluqla qarşılandığını önə çəkib.

Mədəniyyət və Turizm Nazirliyi Aparatının rəhbəri Firudin Qurbanov, Rəssamlar İttifaqının katibi, professor Ağəli İbrahimov, Sumqayıt Mədəniyyət və Turizm İdarəsinin rəisi Namiq Qafarov və başqaları paytaxtdan kənarda yaşayan sənətkarların işlərinin təbliğatının əhəmiyyətindən söz açıblar.

Sərgidə qonaqlar müxtəlif mövzularda 132 rəsm əsəri ilə tanış olublar. Müəlliflər - Vaqif Nəzirov, İntiqam Ağayev, Eldar Rəşidov, Nizami Dadaşov, Aydın Əsgərov, Vüqar Quliyev, Toğrul Ağayev, Xatirə Tapdıqova və Ellada Rəşidova öz əsərləri barədə danışıblar, yaradıcılıqlarından söz açıblar. Əsərlərin nümayişi zamanı salonlarda kamera musiqisi səsləndirilib.

Sərgi iyulun 3-dək davam edəcək.

SARA

525-ci qəzet.- 2009.- 2 iyul.- S.7.