"Azərbaycan beynəlxalq təşkilatlarla əməkdaşlıq və tərəfdaşlıq münasibətindədir"

AZƏRBAYCANIN AŞ PA-DAKI NÜMAYƏNDƏ HEYƏTİNİN ÜZVÜ AYDIN ABBASOV: "BU GÜN AZƏRBAYCAN NÜMAYƏNDƏ HEYƏTLƏRİNİ BÜTÜN BEYNƏLXALQ QURUMLARDA YÜKSƏK SƏVİYYƏDƏ QƏBUL EDİRLƏR"

"Ali Baş Komandan döyüş əmri versə, vətənini, torpağını sevən bir azərbaycanlı, hərbi xidmət keçmiş bir əsgər kimi ön cəbhəyə getməyə hazıram. Ümumiyyətlə, hesab edirəm ki, generalından zabitinə, zabitindən çavuşuna, ən sıravi əsgərinədək hamı vətənin müdafiəsinə hazır olmalı və bundan qürur duymalıdır". Bu fikirləri "525"in suallarını cavablandırarkən bitərəf millət vəkili, Azərbaycanın Avropa Şurası Parlament Assambleyasındakı (AŞPA) nümayəndə heyətinin və sözügedən qurumun Monitorinq Komitəsinin üzvü Aydın Abbasov dilə gətirib. Millət vəkilinin sözlərinə görə, mərhum dövlət başçısı Heydər Əliyevin daxili-xarici siyasət kursunu uğurla davam etdirən indiki ölkə başçısı İlham Əliyevin rəhbərliyi ilə son illər Azərbaycanda tam peşəkar, döyüş qabiliyyətli ordu formalaşdırılıb və bu ordu istənilən an Ali Baş Komandanın əmri ilə Azərbaycan torpaqlarının müdafiəsinə qalxmağa, işğal altında olan torpaqları erməni təcavüzkarlarından azad etməyə qadirdir. Bununla belə, millət vəkili Dağlıq Qarabağ münaqişəsinin hərbi müstəvidə deyil, daha çox siyasi-diplomatik müstəvidə çözülməsinin tərəfdarıdır. A.Abbasov indiki reallıqlar şəraitində hərb variantını bir qədər real görmür: "İnanıram ki, tezliklə bu münaqişə torpaqlarımızın işğaldan azad olunması, bir milyondan artıq insanımızın öz doğma yurd-yuvalarına qayıtması ilə sonuclanacaq. Buna heç kimin şübhəsi olmasın".

- Bu gün Azərbaycan hüquqi, demokratik, dünyəvi dövlət quruculuğu yolunda inamla addımlayır. Artıq bu günün Azərbaycanı ötən əsrin 90-cı illərinin Azərbaycanı deyil. Bu gün Azərbaycan dünyanın ən nüfuzlu dövlətləri, dövlət başçıları tərəfindən tanınır, qəbul edilir. Elə son bir həftə ərzində iki super dövlətin - Rusiya və İsrailin dövlət başçılarının Azərbaycana səfəri, bu səfər çərçivəsində imzalanan sazişlər Azərbaycanın dünyada necə böyük nüfuza malik olmasını bir daha sübut edir.

Əgər bir dövləti inkişaf etdirmək istəyirsənsə, ilk növbədə onun milli ideologiyasını formalaşdırmalısan. Çox sevindirici haldır ki, artıq Azərbaycanda da belə bir ideologiyanın formalaşdırılmasına başlanılıb. Bu ideologiyanın da əsasını mərhum dövlət başçımız Heydər Əliyevin yaratdığı, ortaya qoyduğu azərbaycançılıq, dövlətçilik ideologiyası təşkil edir. Ulu öndərin belə bir kəlamı var, harada yaşayırsınızsa yaşayın, oranın dilini, mədəniyyətini, qanunlarını öyrənin, o dövlətin, o ölkənin həyatında yaxından iştirak edin. Bu, bir ağsaqqal, bir öndər nəsihətidir. Bu baxımdan, hesab edirəm ki, biz növbəti gələcək uğurlarımıza ancaq bu yolla - milli ideologiyanın formalaşdırılması və davamlı həyata keçirilməsi yolu ilə nail ola bilərik.

- Aydın müəllim, Azərbaycanın beynəlxalq təşkilatlarla, o cümlədən təmsilçisi olduğunuz AŞPA ilə münasibətlərini necə qiymətləndirirsiniz?

- Düzdür, zaman-zaman istər AŞPA, istərsə də bəzi beynəlxalq qurumlarla müəyyən səbəblərdən problemlər yaşanıb və yaxud bu yöndə bəzi qüvvələr tərəfindən problemlərin yaşadılmasına cəhd göstərilib, ancaq hesab edirəm ki, bu problemlər artıq arxada qalıb. Bəzi qüvvələrin ciddi cəhdlərinə baxmayaraq, Azərbaycan bu gün istər AŞPA, istərsə də digər beynəlxalq təşkilatlarla yüksək əməkdaşlıq və tərəfdaşlıq münasibətlərindədir. Bu gün artıq Azərbaycan nümayəndə heyətlərini bütün beynəlxalq qurumlarda yüksək səviyyədə qəbul edir, onunla hesablaşırlar. Bunlar isə heç şübhəsiz ki, istər Azərbaycanın beynəlxalq qurumlardakı nümayəndə heyətlərinin, istərsə də bütövlükdə ölkə başçısının apardığı işin nəticəsində mümkün olub. İnanıram ki, bundan sonra da həm AŞPA, həm digər beynəlxalq təşkilatlarla münasibətlərimiz daha yüksələn xətt üzrə inkişaf edəcək.

- Bəs, millət vəkili kimi Milli Məclisin (MM) fəaliyyətini necə qiymətləndirirsiniz? Konkret olaraq sonuncu sessiyanı məhsuldar hesab edirsinizmi?

- Qeyd edim ki, indiki Milli Məclisi zahiri görünüşündən tutmuş, daxili görünüşünə qədər keçmiş parlamentlə müqayisə etmək olmaz. Biz üçüncü çağırış millət vəkilləri ilk dövrlərdə oturmağa belə yer tapmırdıq. Ancaq indi sizə də məlumdur ki, parlamentin ikinci korpusu inşa olunur və inanıram ki, bu korpus istifadəyə verildikdən sonra deputatların fəaliyyəti daha da yaxşılaşacaq. Ümumiyyətlə, bugünkü Milli Məclis keçmiş MDB və postsosialist məkanında analoqu olmayan bir parlamentdir. Buraya gələn xarici qonaqlar, parlamentarilər Milli Məclisin binasının gözəlliyinə heyran olurlar. Təbii ki, bunlar Milli Məclisin fəaliyyətinə, qanunyaradıcılığı prosesinə də müsbət təsir göstərir. Əgər əvvəlki çağırış deputatlar arasında tez-tez qarşılıqlı ittihamların, qalmaqalların, hətta, təhqirlərin şahidi olurduqsa, indi buna rast gəlmək mümkün deyil. İqtidarda, müxalifətdə və yaxud bitərəf mövqeyində dayanmasından asılı olmayaraq, indiki deputatlar arasında qarşılıqlı hörmət mövcuddur. Məsələn, sonuncu sessiya zamanı qəbul olunan istər "Təhsil haqqında", istər "Bədən tərbiyəsi və idman haqqında" qanun layihələri nəinki iqtidaryönlülər, nəinki bitərəflər, həm də müxalifyönlü millət vəkilləri tərəfindən çox yüksək qarşılandı, müsbət qiymətləndirildi. Bəlkə də parlament tarixində ilk dəfə idi ki, belə bir həmrəylik nümayiş olunurdu. Bütün bunları deməkdə məqsədim odur ki, Azərbaycanda yaşanan inkişaf, irəliləyiş parlamentdə də özünü göstərməkdədir.

- Yeri gəlmişkən, təxminən bir ildən sonra dördüncü çağırış parlamentə seçkilər keçiriləcək. Növbəti seçkilərə də qatılmaq fikriniz varmı?

- Bu suala indidən dəqiq cavab vermək bir qədər tezdir. Hələ seçkilərə il yarım vaxt qalır. Yəni, düşünmək, qərar vermək üçün xeyli vaxt var. Eyni zamanda, bu məsələ seçicilərdən asılıdır. Bildiyiniz kimi, üçüncü çağırış parlamentə seçkilərdə mənim namizədliyim seçicilərin təşəbbüs qrupu tərəfindən irəli sürülmüşdü. İndi əgər yenidən belə bir təşəbbüs qrupu yaranarsa, eyni zamanda, ötən dövr ərzindəki fəaliyyətim seçicilərim tərəfindən məqbul sayılarsa, o zaman bu məsələyə baxmaq olar. Yenə də qeyd edirəm, qərar vermək üçün hələ vaxt var.

- Aydın müəllim, siz həm də kifayət qədər tanınmış bir şəxsin - sabiq birinci vitse-premyer Abbas Abbasovun oğlusunuz. İstər vəzifədə olduğu dövr ərzində, istərsə də vəzifədən uzaqlaşdığı müddətdən bu yana atanızla bağlı bəzi mətbuat orqanlarında bir sıra ittiham xarakterli məlumatlar özünə yer almaqdadır.

- Bildiyiniz kimi, Abbas Abbasov uzun illər dövlət, təsərrüfat işində yüksək rəhbər vəzifələrdə çalışıb. O, bir müddət Azərbaycandan kənarda - Özbəkistanda işləyib, fəaliyyət göstərib, quşçuluq təsərrüfatına rəhbərlik edib, keçmiş SSRİ-nin bu sahə ilə bağlı ən tanınmış mütəxəssislərindən biri olub. Sonra yenidən Azərbaycana qayıdıb, bir müddət yenə də əvvəlki işi - quşçuluq təsərrüfatı ilə məşğul olub. Ötən əsrin 80-ci illərinin sonlarında Abşeron Rayon Partiya Komitəsinin birinci katibi vəzifəsində çalışıb. 1992-ci ildən 2006-ci ilə kimi baş nazirin birinci müavini vəzifəsində işləyib. Bununla yanaşı, Rusiya ilə, o cümlədən bir çox dövlətlərlə hökumətlərarası komissiyaya həmsədrlik edib, mərhum dövlət başçımız Heydər Əliyevin tapşırığı ilə bir sıra mühüm məsələlərin həlli ilə məşğul olub, Azərbaycanı MDB İqtisadi Şurasında təmsil edib. Bütün bunlardan sonra görəsən bu ittihamları səsləndirmək, bu böhtanları yağdırmaq nə dərəcədə ədalətlidir? Özünüz də yaxşı bilirsiniz ki, 2007-ci ildə atam istefaya gedərkən dövlət başçısı tərəfindən qəbul olundu, onun dövlət və xalq qarşısında xidmətləri yüksək qiymətləndirilərək Azərbaycanın ən yüksək ordeni "İstiqlal ordeni" ilə təltif edildi. Bir daha qeyd edirəm, bütün bunlardan sonra Abbas Abbasov haqqında bu cür ədalətsiz fikirlər səsləndirmək nə dərəcədə düzgündür? Hər halda, bunu həmin insanların öz vicdanlarına buraxıram.

- Sizcə, bunlar sifarişdirmi?

- Bəli, bunlar atama qarşı olan müəyyən qüvvələrin sifarişidir. Çox təəssüf edirəm ki, bəzi mətbuat orqanları da bilərəkdən və ya bilməyərəkdən bu sifarişin icraçısına çevriliblər.

- Bəs, nəyə görə istər atanız, yaxud istərsə də siz bununla bağlı məhkəməyə müraciət etmirsiniz?

- Axı, biz nəyə görə məhkəməyə müraciət etməliyik? Sadəcə, mən belə hesab edirəm ki, burada bir balaca məsuliyyət olmalıdır. Bir insan haqqında yazı yazanda, fikir söyləyəndə ilk öncə fikirləşməlisən ki, onun ailəsi, uşağı, dostu-tanışı, yaxın ətrafı, keçdiyi həyat yolu, karyerası var. Eyni zamanda, jurnalist araşdırmaları olmalıdır. Jurnalist bir şəxs haqqında yazmazdan öncə onun haqqında ətraflı araşdırma aparmalıdır. Bunun üçün hətta qanunvericilik səviyyəsində imkan, şərait yaradılıb. Get, araşdır gör, bu insan necə insandır, kriminaldır, ya yox, yalnız bundan sonra həmin fikirləri mətbuata ver. Bu gün ümumiyyətlə, dünyada baş nazirlər, prezidentlər, spikerlər, dövlət adamları, siyasətçilər, parlamentarlar haqqında çeşidli məlumatlar, ittihamlar səslənməkdədir. Məsələn, bir vaxtlar Klitonla bağlı ən müxtəlif fikirlər mətbuatda yer alırdı. Özünüz də gördünüz ki, o vaxt onun başına nə oyun açdılar. Son zamanlar isə özünüz şahidsiniz ki, İtaliyanın baş naziri Berluskoni, Fransanın prezidenti Sarkozi və digərləri haqqında nələr yazılmır. Bunlar heç də təsadüfən ortaya çıxmayıb, müəyyən araşdırmalar aparılıb və sonda həmin şəxslərlə bağlı müəyyən faktlar ortalığa qoyulub. Ancaq bir daha qeyd edirəm ki, bir şəxs barəsində fikir söyləyəndə mütləq onu araşdırmalısan, dəqiq götür-qoy etməlisən, daha sonra onun haqqında fikir söyləməlisən. Yoxsa, sənin söylədiyin böhtandan başqa heç nə olmayacaq.

- Ümumiyyətlə, Abbas müəllim yenidən siyasətə qayıtmaq fikrindədirmi?

- Birincisi, Abbas müəllim siyasətçidən, siyasət adamından daha çox peşəkar iqtisadçı, təsərrüfatçı olub. O, daha çox kənd təsərrüfatı ilə, aqrar sektorla bağlı adam olub. Baş nazirin birinci müavini vəzifəsində işləyərkən də daha çox bu sahəni kurasiya edib. Bu baxımdan, Abbas müəllimi peşəkar siyasətçidən daha çox peşəkar təsərrüfatçı, dövlət adamı hesab etmək olar. Eyni zamanda, şəxsən mən onun siyasətə qayıtmasını istəmirəm. Onun 60 yaşı var, getsin övladlarını, nəvələrini başına yığıb onlarla məşğul olsun. Ancaq bu heç də o demək deyil ki, atam qocalıb. Maşallah, heç cavanlardan geri qalmır.

- Bildiyimizə görə, atanız hazırda əslən Azərbaycandan olan rusiyalı iş adamı Telman İsmayılovun AST Şirkətlər Qrupunda çalışır. Eyni zamanda, o da məlumdur ki, son günlər həmin şirkətin ətrafında müəyyən qalmaqal yaşanmaqdadır. Daha doğrusu, Telman İsmayılovun Türkiyədə məşhur otel inşa etdirməsindən və onun təntənəli açılışından sonra onunla bağlı Rusiyanın hüquq-mühafizə orqanları tərəfindən araşdırmalara başlanılıb. Bu baxımdan bilmək istərdik, siz özünüz "AST Telman" ətrafında yaranmış ajiotajla bağlı nə fikirdəsiniz?

- Əslində mən bu işin dərinliyinə bir o qədər də varmamışam. Belə olan halda mən nə deyə bilərəm? Eyni zamanda, siz doğru qeyd etdiniz, bu, sadəcə bir ajiotajdır, hay-küydür. Bununla yanaşı, baş verənlərə bir azərbaycanlı kimi kənardan baxanda, seyr edəndə görürsən ki, buna ancaq bizim düşmənlərimiz olan ermənilər sevinə bilər. Eyni zamanda, axı görəsən, bir azərbaycanlının, iş adamının Türkiyədə, onun ən məşhur istirahət şəhərlərindən biri olan Antalyada bu cür dəbdəbəli, Avropada analoqu belə olmayan otel inşa etdirməsinin nəyi pisdir ki? Yenə də qeyd edirəm, bundan ancaq və ancaq ermənilər narahat ola bilərlər.

- Deyirsiniz ki, burada da bir erməni barmağı ola bilər?

- Hər halda, mən bir vətəndaş kimi öz fikrimi söyləyirəm. Məsələn, bugünlərdə Tiqran Tevosyan adlı bir erməninin internet saytlarından birində məqaləsini oxudum. O, həmin yazısında Moskva meri Yuri Lujkovdan başlayır, gəlib qurtarır Çerkizov bazarında. Qeyd edir ki, axı bu məsələ nə tez başa çatdı, nə tez qurtardı və sair və ilaxır. Açıq-aşkar görünür ki, bunlar erməniləri sevindirir.

Eyni zamanda, mən bu məsələni Rusiya dövləti səviyyəsində azərbaycanlı iş adamına və yaxud iş adamlarına qarşı aparılan kampaniya kimi qiymətləndirməyi də düzgün hesab etmirəm. Çox güman ki, müəyyən araşdırma aparılandan sonra hər şey yoluna düşəcək, məlum ajiotaj aradan qalxacaq. Hər halda mən belə başa düşürəm.

Kamil HƏMZƏOĞLU

525-ci qəzet.- 2009.- 3 iyul.- S.3.