Tanınmış pianoçu Adilə Əliyeva ilə görüş olub

Musiqi Mədəniyyəti Muzeyində Fransa Ali Beynəlxalq Musiqi Akademiyasının direktoru, Azərbaycanın əməkdar artisti, istedadlı pianoçu Adilə Əliyeva ilə görüş keçirilib.

Tədbirə sənətkarın həyat və fəaliyyətini əks etdirən, fransız dilində çəkilmiş "Musiqi ilə yaşamaq" sənədli filminin nümayişi ilə start verilib. Sonra muzeyin direktoru Alla Bayramova dünyanın ən nüfuzlu konsert salonlarında məharətlə çıxış edən tanınmış pianoçunun yaradıcılığından danışıb: "Hazırda Fransada yaşayan musiqiçi Bakı şəhərində dünyaya gəlib. 5 yaşından piano ifa edən Adilənin 6 yaşındaykən radioda ilk çalğısı səslənib. O, "Dostluq melodiyaları" sənədli filmində Niyazinin rəhbərliyi ilə Şostakoviçin ikinci konsertini ifa edib. Sonradan Adilə Əliyeva Moskvaya köçərək orada Çaykovski adına Moskva Konservatoriyasını fərqlənmə diplomu ilə bitirib".

Qarayev, E.Denisov, P.Çaykovski kimi bəstəkarların əsərlərinin ifaçısı olan A.Əliyeva üçün R.Şedrin, D.Bayers, V.Mustafazadə, R.Mirişli, A.Dadaşov əsərlər həsr ediblər.

Tədbirdə çıxış edən bəstəkar Oqtay Rəcəbov, Bəstəkarlar İttifaqının məsul katibi Lalə Hüseynova, jurnalist Qalina Mikeladze, Rostropoviçlər muzeyinin direktoru Ş.Heydərova və digər qonaqlar indiyədək 30 kompakt diski buraxılan pianoçunun sənət yolu barədə fikirlərini bölüşüblər.

Onlar İngiltərə, Almaniya, Belçika, Hollandiya, Danimarka, İsveç, İsveçrə, Norveç, Finlandiya, İslandiya və başqa ölkələrin televiziya və radiolarında A.Əliyeva haqqında verilişlər hazırlandığını, mətbuatda məqalələr dərc olunduğunu qeyd ediblər.

Görüşdə A.Əliyeva yeni yaradıcılıq planlarından söhbət açıb və sonda dünya klassiklərinin əsərlərindən parçalar ifa edib.

SARA

525-ci qəzet.- 2009.- 4 iyul.- S.23.