"Azərbaycan mətbuatı tarixi" bu gün təqdim olunur

Bu gün "Şərq" qəzetinin baş redaktoru Akif Aşırlının "Elm və təhsil" nəşriyyatı tərəfindən nəşr edilən "Azərbaycan mətbuatı tarixi" (1875-1920)" kitabının təqdimat mərasimi olacaq. Tədbir saat 11.00-da Atatürk Mərkəzində keçiriləcək. Məlumat üçün qeyd edək ki, kitabda milli mətbuat tariximizin mənbəşünaslığı, milli mətbuata hazırlıq dövrü, "Əkinçi" ilə başlanan yol, "Ziya" (Ziyayi-Qafqaziyyə), "Kəşkül", "Şərqi-Rus", "Həyat", "İrşad", "Füyuzat" kimi qəzet və dərgilər mövcud elmi tədqiqat materialları, monoqrafiyalar və arxiv sənədləri, memuar ədəbiyyatlarından istifadə edilərək yenidən işlənilib. 295 səhifə həcmində olan kitabda "Molla Nəsrəddin" jurnalistika məktəbi ilə yanaşı, I Dünya Müharibəsi ərəfəsində və illərində mətbuat, Haşım bəy Vəzirovun yaratdığı mətbu orqanları ilə bağlı yazılar əksini tapıb, bu nəşrlərin ideya-siyasi istiqamətləri müəyyənləşdirilib.

Kitabın bir bölümü Azərbaycan Xalq Cümhuriyyəti dönəmi mətbuatına həsr edilib. Kitabda həmçinin milli mətbuat nümunələrimizin ilk səhifələrinin şəkilləri yerləşdirilib, bir bölümdə isə tarixi mətbu irsimizin səhifələrindən hissələr dərc edilib.

Kitabın təqdimat mərasimində BDU-nun jurnalistika fakültəsinin müəllimləri, tanınmış yazarlar, Mətbuat Şurası İdarə Heyətinin üzvləri və jurnalist birliklərinin nümayəndələri iştirak edəcəklər.

Xatırladaq ki, sonuncu dəfə ikihissəli "Azərbaycan mətbuatı tarixi" kitabı 1973-1974-cü illərdə çap edilib. Müəllif 35 ildən sonra bu sahədəki boşluğu doldurmağa çalışıb. A.Aşırlının "Azərbaycan mətbuatı tarixi" kitabı 500 tirajla nəşr olunub.

525-ci qəzet.- 2009.- 21 iyul.- S.3.