İşıqlı insan

Ermənistanla həm də informasiya müharibəsi apardığımız bu dönəmlərdə Azərbaycan həqiqətlərinin xarici ölkələrdə təbliğatı heç şübhəsiz mühüm əhəmiyyət daşıyan məsələlərdəndir. Sirr deyil ki, ölkəmizin üzləşdiyi problemlərin əcnəbilərə çatdırılması, həmçinin mədəniyyətimizin tanıdılması üçün Azərbaycanın diaspor təşkilatlarının, xaricdə yaşayan həmvətənlərimizin üzərinə ağır yük düşür. Elxan Sarıyev uzun illərdir, bu yükü çiynində daşıyan dəyərli azərbaycanlılardandır...

Sarıyev Elxan Qaraxan oğlu 1965-ci ilin mayın 20-də Ağcabədi rayonunun Qaravəlli kəndində anadan olub. 1972-1982-ci illərdə orta məktəbdə təhsil aldıqdan sonra "Komsomol" kolxozunda (1982-1983) işləyib. 1983-1985-ci illərdə Sovet ordusunda xidmət edib. Hərbi xidmətini başa vurandan bəri Ukraynanın Odessa şəhərində yaşayır. Odessa Dövlət Universitetinin hüquq fakültəsini bitirib. 1989-cu ildən indiyədək "Kaspi", "Sardoniks", "Romsar" şirkətlərinin rəhbərliyində çalışıb, "SPS" Səhmdar Cəmiyyətində hüquqşünas işləyib. 2001-ci ildən "Setko-Servis" firmasının təsisçisi və baş direktorudur. Bir oğlu, bir qızı var.

Əsl vətənpərvər və ziyalı bir insan olan Elxan Sarıyevin ictimai fəaliyyətinə gəlincə, o, Ukraynanın ən böyük və gözəl şəhərlərindən olan Odessada ölkəmizin diaspor təşkilatını yaradan ilk azərbaycanlıdır. Azərbaycan üçün yorulmadan fəaliyyət göstərdikdən sonra E.Sarıyev 2001-2003-cü illərdə Ukrayna Azərbaycanlıları Konqresinin Odessa vilayəti təşkilatının sədri, 2003-cü ildən fəxri sədri və qurumun İdarə Heyətinin üzvüdür.

Odessada Elxan Sarıyev bizi əsl azərbaycanlılara xas qonaqpərvərliklə qarşıladı. Düzü, vaxtımızın darlığı səbəbindən Elxan müəllim azərbaycanlı jurnalistləri Odessayla yaxından tanış edə bilmədi. "Başqa vaxta qalsın" - deyib Odessaya yenidən qayıdacağımızı vəd etdik. Hərçənd elə Elxan müəllimin şəxsiyyəti bizdə Odessa haqda müəyyən təəssürat oyada bildi. Doğrudan da, bəzən bir insan, daha doğrusu, onun davranışı, daxili mədəniyyəti yaşadığı şəhər və ölkə haqda müəyyən rəy yaratmaq gücündədir. Odessanı Elxan Sarıyevin timsalında da gözəl bir şəhər kimi tanıdıq. Elxan müəllim Odessa, deməli, həm də Ukraynada tanınmağı bacarmış bir ziyalı və əsl azərbaycanlıdır.

Odessa vilayətində Azərbaycanın və onun böyük şəxsiyyətlərinin tanıdılması üçün Elxan Sarıyev az iş görməyib. Azərbaycan üçün əlamətdar günlərdə E.Sarıyev öz şəxsi vəsaiti hesabına Odessada müəyyən tədbirlər keçirir. Bu yaxınlarda isə E.Sarıyev daha çətin və məsuliyyətli işə başlayıb. Onun birbaşa təşəbbüsü və təşkilatçılığı ilə Ukraynada ümummilli lider Heydər Əliyev haqqında sənədli filmin çəkilişinə başlanılıb. Filmdə Heydər Əliyevin SSRİ Nazirlər Soveti sədrinin birinci müavini və Siyasi Büronun üzvü olduğu dövrdə Ukrayna xalqına göstərdiyi qayğı əksini tapacaq.

Məlum olduğu kimi, 1986-cı ilin avqustun 31-də "Admiral Naximov" adına sərnişin gəmisinin Qara dənizdə batması nəticəsində 423 həlak nəfər ölüb. Xilas edilən insanların sayı 836 nəfər olub. E.Sarıyevin sözlərinə görə, filmin əsas süjet xətti Heydər Əliyevin gəminin sərnişinlərinin xilas edilməsi üçün yaradılan Dövlət Komissiyasının sədri kimi göstərdiyi fəaliyyət əks olunur. Sənədli filmin çəkilişi üçün Rusiyanın ORT kanalının arxivindən istifadə edilib. Gəminin batması və ora göstərilən köməkliklərlə bağlı filmin daha mükəmməl ərsəyə gətirilməsi üçün ORT-yə müraciət edilib və arxivdən lazımi olan informasiyalar götürülüb.

E.Sarıyev bundan Odessa şəhərində Heydər Əliyevin "Admiral Naximov" gəmisinin sərnişinlərinə göstərdiyi xidmətlərinə dair xüsusi muzey yaratmağı da nəzərdə tutub.

Odessa vilayətində Azərbaycanın təbliğatı istiqamətində fəaliyyətini davam etdirən Elxan Sarıyev soydaşlarımızın Ukrayna Ali Radasında və yerli hakimiyyət orqanlarında təmsil olunmasını vacib sayır. Onun fikrincə, bu halda Ukraynada yaşayan həmvətənlərimizin problemlərini daha operativ və səmərəli həll etmək mümkündür. Şübhəsiz ki, bunun üçün azərbaycanlıların həmrəyliyi əsas şərtlərdəndir. E.Sarıyev soydaşlarımıza bu işdə dəstək olmaq üçün əlindən gələni etməyə hazır olduğunu deyir.

Odessayla qısa tanışlığımızı başa vurub Kiyevə yola düşürük. Elxan müəllim təkidlə yenidən Odessaya dönməyimizi istəyir. Tərəddüd etmədən razılaşırıq. Axı, adamın rastına həm də həmişə belə işıqlı, eyni zamanda vətənpərvər insanlar çıxmır...

AYDIN

525-ci qəzet.- 2009.- 28 iyul.- S.3.