Bolqarıstanlı təhsil xadimi ilə Bakı Slavyan Universitetində görüş keçirilib

Dünən Bolqarıstanın Milli və Dünya Təsərrüfatı Universitetinin rektoru Borislav Borisov Bakı Slavyan Universitetinin (BSU) qonağı olub. Qonağı Bolqarıstanın Azərbaycandakı səfiri Vasil Kalinov müşayiət edib.

Öncə qonaq BSU-da fəaliyyət göstərən Bolqar Dili və Mədəniyyəti Mərkəzilə tanış olub. BSU-nun rektoru, professor Kamal Abdulla universitetdə bolqar dilinin ixtisas kimi öyrənilməsindən, Bolqar Dili və Mədəniyyəti Mərkəzinin fəaliyyətindən, Bolqarıstanın qabaqcıl ali təhsil ocaqları ilə əlaqələrdən danışıb. Bolqar və Azərbaycan xalqları arasında mövcud olan dostluq əlaqələrinə toxunan K.Abdulla bu münasibətlərin tarixi köklərə söykəndiyini bildirib. Rəhbərlik etdiyi ali təhsil müəssisəsi barədə məlumat verən B.Borisov bildirib ki, universitetin bir sıra xarici ölkə ali məktəblərilə, o cümlədən BSU ilə əməkdaşlıq münasibətləri mövcuddur. B.Borisov Azərbaycan və Bolqarıstan arasındakı diplomatik, iqtisadi, mədəni əlaqələrə də toxunub, perspektivlərdən söz açıb.

Sonra Vasil Kalinov iki ölkə arasında əlaqələrin möhkəmləndirilməsi, bolqarşünaslıq ixtisasının, bolqar dilinin öyrənilməsinin təşkilindəki xidmətlərinə görə Kamal Abdullaya Bolqarıstan səfirliyinin fəxri nişanını təqdim edib. Azərbaycan dilində "Bolqarıstanın tarixi" dərsliyinin müəllifi, BSU-nun Avropaşünaslıq kafedrasının dossenti Habil Məmmədov da təltif olunub.

Görüşün sonunda iki universitet arasındakı əlaqələri inkişaf etdirmək məqsədilə tərəflər arasında əməkdaşlıq müqaviləsi imzalanıb. Bu müqavilə tədris və elmi-tədqiqat sahələrində əməkdaşlığı, tələbə-müəllim mübadiləsini nəzərdə tutur.

S.QARAYEVA

525-ci qəzet.- 2009.- 4 iyun.- S.2.