Bakı Slavyan Universitetində akademik Məmməd Ariflə bağlı guşə yaradılıb

Dünən Bakı Slavyan Universitetində (BSU) görkəmli ədəbiyyatşünas akademik "Məmməd Arif Dadaşzadə guşə"sinin açılış mərasimi keçirilib. Qeyd edək ki, bir müddət əvvəl Məmməd Arif Dadaşzadənin şəxsi kitabları ailə üzvləri tərəfindən BSU-nun kitabxanasında hədiyyə olunub. Mərasimdə BSU-nun rektoru, professor Kamal Abdulla çıxış edərək, M.A.Dadaşzadənin elmi yaradıcılığından söz açıb. Müasir ədəbi fikrin formalaşmasında Məmməd Arifin xüsusi rolu olduğunu qeyd edən rektor onun kitablarını milli ədəbiyyata və mədəniyyətə layiqli töhfə kimi dəyərləndirib. BSU kitabxanasına hədiyyə etdikləri kitablara görə akademikin nəvələri Zümrüd xanıma və Aqşin müəllimə minnətdarlığını bildirən K.Abdulla bu əsərləri universitetə verilən dəyərli əmanət adlandırıb.

Tədbirdə Azərbaycan Yazıçılar Birliyinin sədri, xalq yazıçısı Anar, akademik Bəkir Nəbiyev, professor Şirməmməd Hüseynov da çıxış edərək, M.A.Dadaşzadə ilə bağlı xatirələrini, onun elmi irsi barədə fikirlərini bölüşüblər.

M.A.Dadaşzadənin nəvəsi Zümrüd xanım kitablar üçün xüsusi guşə ayrıldığına görə universitet rəhbərliyinə təşəkkür edib. Kitabların BSU-ya təqdim olunmasının səbəbini açıqlayarkən bildirib ki, Məmməd Arifin yaradıcılığında Azərbaycan ədəbiyyatı ilə yanaşı, rus ədəbiyyatının da tədqiqi geniş yer tutub.

Sevinc QARAYEVA

525-ci qəzet.- 2009.- 5 iyun.- S.7.