Qələm dostları Vaqif Səmədoğlunun yubileyini qeyd ediblər

Ötən gün Yazıçılar Birliyində (AYB) xalq şairi, tanınmış dramaturq, millət vəkili Vaqif Səmədoğlunun 70 illik yubileyilə bağlı mərasim keçirilib. Mərasimi giriş sözü ilə açan AYB-nin sədri, xalq yazıçısı Anar böyük ədəbi simalardan biri kimi səciyyələndirdiyi V.Səmədoğlunun keçən əsrin 60-cı illərində öz səsi, fərqli nəfəsi, təkrarsız üslubu ilə Azərbaycan ədəbiyyatına gəldiyini bildirib. Onun poeziya ilə yanaşı dramaturgiyada da öz sözünü dediyini qeyd edən Anar V.Səmədoğlunun həm də milli hərəkatın görkəmli liderlərindən biri kimi tanındığını önə çəkib. Anar V.Səmədoğlunun poeziyasında kədər və bədbinliyin üstün mövqe tutduğunu, ancaq ümumən yaradıcılığına mənalı yumorun xas olduğunu vurğulayıb.

AYB-nin birinci katibi, xalq şairi Fikrət Qoca V.Səmədoğlunu görkəmli şair, istedadlı qələm sahibi olmaqla yanaşı, həm də sadiq dost kimi yüksək dəyərləndirib.

Millət vəkili, xalq şairi Sabir Rüstəmxanlı yubilyarın çətin və şərəfli ömür yoluna nəzər salıb, onu ilk növbədə dəyərli ziyalı olaraq qiymətləndirdiyini söyləyib: "Məqamı gəlib çatanda və ziyalılardan bəziləri tərəddüd edəndə o, heç nədən çəkinməyib. Vaqif Səmədoğlu kamil şair olduğu kimi, mükəmməl də siyasətçidir".

"Psixoloji nöqteyi-nəzərdən onun 27 yaşı var. Lakin o həm də bütün dünyaya Azərbaycan cazibəsini çatdıracaq qədər qədimdir. Səməd Vurğunun oğlu olmaq çox ağır məsuliyyətdir. Vaqif öz şərəfli həyatı ilə həm bu məsuliyyətin öhdəsindən gəldi, həm də sübut etdi ki, o, məhz Vaqif Səmədoğludur. Onun mövqeyi, düşüncələri həmişə Azərbaycanla bağlı olub. Vaqif Səmədoğlunun inqilabi hissləri quruculuğa yönəlib". Bu fikirləri tədbirdə millət vəkili Asim Mollazadə səsləndirib.

Şair Ramiz Rövşən V.Səmədoğlunun 20-ci əsrdə Füzuli kədərini qələmə alan şair kimi xarakterizə edib. Onun bir şair və insan kimi ən üstün keyfiyyətinin səmimilik olduğunu bildirən R.Rövşən yubilyarı həmişə özünə, daxilinə, vicdanına sadiq qaldığını dilə gətirib: "Onun qeyri-səmimi bircə misrası da yoxdur". V.Səmədoğlunun Nüşabə xanımın timsalında özünə mükəmməl ömür-gün yoldaşı seçdiyini qeyd edən R.Rövşən onların bundan sonra da həyatda birlikdə addımlamalarını arzulayıb.

V.Səmədoğlu ilə 1970-ci illərin əvvəllərində tanış olduğunu deyən millət vəkili, yazıçı-publisist Elmira Axundova onu əsasən dissident şair kimi tanıdığını söyləyib: "O, 70-ci illərdə də, indi də sözün yaxşı mənasında dissident şairdir. Sadə olduğu qədər də dahi insan olan Vaqif Səmədoğlu əsl Azərbaycan ziyalısıdır". Müstəqilliyimizin qazanılmasında V.Səmədoğlunun da böyük əməyi olduğunu vurğulayan E.Axundova ona yeni yaradıcılıq uğurları diləyib, gələcəkdə də əvvəlki kimi gözəl əsərlər yazmasını arzu edib. Yazıçı Natiq Rəsulzadə və başqaları da çıxışlarında V.Səmədoğlunun poeziyasının böyük mənəvi tutumunu, dərin səmimiliyini və aktual bəşəri mövzulara güzgü tutmasını parlaq məziyyətlər kimi önə çəkiblər.

Sonda söz alan yubilyar yaradıcılığı və şəxsiyyəti haqqında söylənilən fikirlərə görə həmkarlarına minnətdarlığını bildirib.

Sevinc MÜRVƏTQIZI

525-ci qəzet.- 2009.- 9 iyun.- S.7.