İsmayıl Şıxlının yubileyi Qazaxda da qeyd olunub

Xalq yazıçısı İsmayıl Şıxlının anadan olmasının 90 illik yubileyilə bağlı növbəti tədbir sənətkarın doğulduğu Qazaxda keçirilib. Bu barədə Yazıçılar Birliyinin (AYB) mətbuat xidmətindən məlumat verilib. Birliyin təşəbbüsü ilə keçirilən tədbir Regionların İnkişafı İctimai Birliyi (RİİB) və Qazax Rayon İcra Hakimiyyətinin dəstəyilə reallaşıb. Tədbir qonaqların yazıçının Qazax şəhərindəki abidəsini ziyarət etmələrilə başlayıb.

Rayon mədəniyyət evində davam etdirilən yubiley mərasimini AYB Qazax filialının sədri, şair Barat Vüsal açıb, İ.Şıxlının ömür və yaradıcılıq yolundan danışıb.

Akademik Teymur Bünyadovun, yazıçılar Nahid Hacızadə, Vidadi Babanlının çıxışlarında millilik və bəşərilik, azərbaycançılıq, ziyalılıq, əqidə və xarakter bütövlüyü, sadəlik və müdriklik İ.Şıxlının insan və yazıçı portretinin əsas cizgiləri kimi dəyərləndirilib. Çıxış edənlər onun yaradıcılıq nümunələrinin məna tutumu, orijinallığı ilə seçildiyini, ədibin əsərlərində hər zaman aktual problemlərin işıqlandırıldığını diqqətə çatdırıblar.

Yazıçının oğlu Elçin Şıxlı atasının xatirəsinə göstərilən diqqət və ehtirama görə minnətdarlığını bildirib. Sonda rayonun özfəaliyyət kollektivləri yazıçının əsərlərindən ibarət ədəbi-bədii kompozisiya nümayiş etdiriblər.

S.MÜRVƏTQIZI

525-ci qəzet.- 2009.- 9 iyun.- S.7.