Venesiyada Azərbaycan
sərgisi açılıb
İtaliyanın Venesiya şəhərində 53-cü Venesiya Biennalisinin - yeni ümumdünya müasir incəsənət sərgisinin açılışı olub. Mədəniyyət və Turizm Nazirliyinin mətbuat katibi Zöhrə Əliyevanın APA-ya verdiyi məlumata görə, iki il əvvəl olduğu kimi, Azərbaycan pavilyonu yenə də Venesiyanin "Giudecca-Zitelle" teatrında yerləşir. Azərbaycan nümayəndə heyətinə mədəniyyət və turizm naziri Əbülfəs Qarayev başçılıq edir. Nazirliyin təsviri və dekorativ sənət sektorunun müdiri, əməkdar incəsənət xadimi Leyla Axundzadə Azərbaycan sərgisini təqdim edərək pavilyonda toplaşanlara rəssamlarımızı tanıdıb. Pavilyonumuzun mövzusu məşhur fransız filosofu Dekartın bir ifadəsini əks etdirir: "Düşünürəm, demək mövcudam". Tahir Salahov, Nailə Sultan, Teymur Rüstəmov, Teymur Daimi, Niyaz Nəcəfov, Fərid Rəsulov, Tərlan Qorçu və "Xətt" İncəsənət qrupunun əsərləri yer alan sərgi noyabr ayınadək davam edəcək.