Yazıçı və alim Elmira Zamanovanın yubileyi qeyd olunub
Ötən gün Yazıçılar Birliyində
(AYB) fantast yazıçı,
fizika-riyaziyyat elmləri
doktoru Elmira Zamanovanın 70 illik yubileyinə həsr olunmuş mərasim keçirilib. Mərasimi giriş sözü ilə açan AYB-nin katibi Çingiz Abdullayev E.Zamanovanın yaradıcılığından
danışıb, onun
elmi-fantastik janrda dəyərli əsərlər
qələmə aldığını
vurğulayıb.
AYB-nin mətbuat xidmətinin
rəhbəri, şair Ədalət Əsgəroğlu
yubilyarı təbrik edərək, onun bədii
yaradıcılığa başladığı il dövrdən
- hələ 1970-ci illərdə yazdığı fantastik
hekayələrlə oxucuların rəğbətini
qazandığını dilə gətirib: "Elmira Zamanova
az sayda yazıçının müraciət etdiyi fantastika
janrında yazıb-yaradır. Onun "Yeraltı
dünya", "Ruhlar bizimlədir" və digər
kitabları xüsusi maraqla qarşılanıb. "Daş həyat"
hekayəsi əsasında televiziya tamaşası çəkilib.
Bədii yaradıcılıqla yanaşı, Elmira Zamanova elmi
fəaliyyətlə də ardıcıl məşğul
olur. İki dərs vəsaitinin, bir monoqrafiyanın, yüzdən
artıq elmi işin, on ixtiranın müəllifidir və
hazırda Milli Elmlər Akademiyası Fizika İnstitutunda
şöbə müdiri vəzifəsində
çalışır". Sonra Ə.Əsgəroğlu AYB
adından yubilyara diplom və hədiyyə təqdim edib.
Tədbirin
aparıcısı, yazıçı-dramaturq Firuz Mustafa
yubilyarın vətənpərvərlik mövzusunda da dəyərli
əsərlər yazdığını, Qarabağ dərdlərini
əks etdirən kitabını xüsusi vurğulayıb.
Yazıçı Natiq Rəsulzadə
E.Zamanovanın yaratdığı ədəbi obrazların
canlılığını, fantastika janrında qələmə
alınsa da, əsərlərində real insanların təsvir
olunmasını önə çəkib.
"Elmira Zamanova
yüksək mədəni səviyyəyə malik olmaqla
yanaşı, həm də güclü istedad sahibidir. Onun
fizika-riyaziyyat sahəsində gördüyü işlər
elmimizi zənginləşdirdiyi kimi, bədii
yaradıcılığı da ədəbiyyatımıza
oxunaqlı əsərlər bəxş edib". Bu fikirləri
tədbirdə yazıçı-publisist Xeyrəddin Qoca səsləndirib.
Yubiley mərasimində
alim-yazıçının tələbələri də
çıxış edərək E.Zamanovanın pedaqoji fəaliyyətindən
məmnunluqla söz açıblar.
Sonda
çıxış edən E.Zamanova
yaradıcılığı haqqında xoş sözlərə
və səmimi çıxışlara görə tədbirin
təşkilatçılarına, qonaqlara minnətdarlığını
bildirib.
525-ci qəzet.- 2009.- 20 iyun.- S.22.