"Zülmətdə parlayan qılınc" təqdim olundu

Dünən Yazıçılar Birliyində şair-publisist və nasir Eldar İsmayılın "Zülmətdə parlayan qılınc" kitabının təqdimat mərasimi keçirilib. Tədbiri giriş sözü ilə açan şair Ənvər Əhməd E.İsmayılın təqdim olunan kitabının bədii dəyərindən danışıb. E.İsmayılın indiyədək 30-dan artıq kitab yazdığını çıxışında önə çəkən Ə.Əhməd həmin nəşrlərdə onun millətin dərdlərini qələmə aldığını bildirib: "Eldar İsmayılın əsərlərində Qarabağ, Göyçə dərdi xüsusən qabardılır. Vətənpərvər şairin poeziyasının əsasını onun vətənə olan bağlılığı, səmimi sevgisi təşkil edir".

Şair Musa Ələkbərli, jurnalist Qabil Zimistanoğlu E.İsmayılın təqdim olunan kitabının tarixi-bədii əhəmiyyətindən bəhs edərək, mövzunun aktuallığını önə çəkiblər.

Tarixi-sənədli "Zülmətdə parlayan qılınc" romanındakı ictimai-siyasi hadisələr XIX əsrin sonları, XX əsrin əvvəllərində Qərbi Azərbaycanda, əsasən Göyçə mahalında və ona yaxın ərazilərdə cərəyan edir. Əsərin qəhrəmanı uzun illər çar üsul-idarəsində məmur işləyən Qaraimanlı Məşədi İsa xeyirxah, maaarifpərvər və bacarıqlı bir türk oğlu kimi təsvir olunub. Oxucular Məşədi İsanın və onun silahdaşlarının timsalında Azərbaycan türklərinin 1905-07, 1918-19-cu illərdə erməni-daşnak birləşmələrinə qarşı apardığı mübarizəyə yaxından bələd ola bilərlər. Əsəri qələmə alarkən müəllif 38-dən artıq tarixi mənbədən və ədəbiyyatdan istifadə edib.

S.MÜRVƏTQIZI

525-ci qəzet.- 2009.- 24 iyun.- S.7.