Hərbi vətənpərvərliyin təbliğində mətbuatın rolu mövzusunda seminar keçirilib

Tərxis Olunmuş Hərbçilərin Gəncləri Maarifləndirmə İctimai Birliyi (TOHGMİB) "Gənclər arasında hərbi-vətənpərvərlik dəyərlərinin təbliğində mətbuatın rolu" adlı seminar keçirib. Seminar Qeyri-Hökumət Təşkilatlarına Dövlət Dəstəyi Şurasının maliyyə yardımı ilə gerçəkləşdirilən "Gənclərin hərbi-vətənpərvərlik tərbiyəsində KİV-in rolunun artırılması" layihəsi çərçivəsində təşkil olunub. Layihənin koordinatoru, TOHGMİB-nin sədri Emin Həsənli seminar iştirakçılarını 26 İyun Silahlı Qüvvələr Günü münasibətilə təbrik edib. Ordu ilə bağlı mətbuatda yayılan məlumatların daha obyektiv və ədalətli olmasının vacibliyini vurğulayan E.Həsənli deyib ki, layihə çərçivəsində keçirilən tədbirlər öz müsbət nəticələrini verməkdədir.

Hərbi-vətənpərvərlik mövzusunda yazan KİV nümayəndələrinin iştirak etdikləri seminarın gedişində müvafiq mövzuda təlimlər təşkil olunub. Təlimçi - təcrübəli hərbçi-yazar, əməkdar jurnalist İbrahim Rüstəmov KİV təmsilçilərinə mətbuatda xəbərlərin araşdırılması və hazırlanması, öz hüququndan effektiv istifadə etmə bacarığı, həmçinin yaradıcılıq prosesi barədə ətraflı məlumat verib. Təlim iştirakçıları onlara verilən nəzəri və praktiki tapşırıqların həllilə məşğul olublar.

Seminarın sonunda "Gənclərin hərbi-vətənpərvərlik tərbiyəsində KİV-in rolunun artırılması" layihəsi çərçivəsində keçirilən yazı müsabiqəsinin qalibləri fəxri diplom və pul mükafatları ilə təltif ediliblər.   

AQİL

525-ci qəzet.- 2009.- 30 iyun.- S.5.