Yunanıstan səfiri Bakı Slavyan Universitetinin qonağı olub

Bakı Slavyan Universiteti (BSU) dünyanın müxtəlif ölkələri ilə elmi-mədəni əlaqələrin qurulması və təhsil sahəsində əməkdaşlığın gücləndirilməsi yolunda başladığı işi uğurla davam etdirir. Öz ənənəsinə sadiq qalan universitetin növbəti qonağı Yunanıstanın Azərbaycandakı səfiri İoannis Metaksas olub. Səfirin gəlişi BSU-da fəaliyyət göstərən "Müasir Yunan dili və Mədəniyyəti Mərkəzi"nin işi ilə tanışlıq məqsədi daşıyıb. Qeyd edək ki, Mərkəz 2004-cü il iyunun 5-dən fəaliyyət göstərir. Açılış mərasimində Yunanıstanın keçmiş prezidenti Konstantinos Stefanopulos şəxsən iştirak edib.

   BSU-nun Beynəlxalq Əlaqələr üzrə prorektoru professor Sahibə Qafarova səfiri qəbul edərək, universitet haqda məlumat verib və Mərkəzin fəaliyyətindən danışıb. Mərkəzin ehtiyacları və onunla bağlı planları müzakirə etmək istədiyini deyən İ.Metaksas bildirib ki, Yunanıstan prezidenti Karolas Papulias bu Mərkəzə xüsusi diqqət yetirir və bu ölkədə səfərdə olarkən prezident İlham Əliyevə Mərkəzin fəaliyyətilə bağlı təşəkkürünü bildirib.

   S.Qafarova ilə geniş fikir mübadiləsi etdikdən sonra səfir yunanşünaslıq ixtisasına yiyələnən tələbələrlə görüşüb. Tələbələrlə yunan dilində ünsiyyətdə olan səfir onların suallarına cavab verib. Tələbələri ən çox maraqlandıran suallar Yunanıstanın təhsil sistemi və onların ali təhsil ocaqlarında təcrübə keçmək perspektivi ilə bağlı olub. Suallara ətraflı cavab verən İ.Metaksas bildirib ki, Mərkəzin daha da səmərəli fəaliyyət göstərməsi üçün əlindən gələni edəcək.

Qarayeva Sevinc

525-ci qəzet.- 2009.- 4 mart.- S.3.