Milli təhlükəsizlik orqanlarının yaranmasının 90 illik yubileyi qeyd edilib

Azərbaycanın milli təhlükəsizlik orqanlarının yaranmasının 90 illik yubileyi ərəfəsində Milli Qəhrəman Eldar Harun oğlu Məmmədovun adını daşıyan 189 saylı orta məktəbdə tədbir keçirilib. Milli Təhlükəsizlik Nazirliyinin İctimai Əlaqələr Mərkəzindən verilən məlumata görə, tədbirdə MTN-in Səbayel rayon idarəsinin əməkdaşları, Səbayel rayon İcra Hakimiyyəti başçısının birinci müavini, Milli Qəhrəmanları İctimai Tanıtma Birliyinin Bakı şəhər üzrə Departamentinin sədri, Bakı Təhsil İdarəsi və Respublika Təhsil Şurasının nümayəndəsi, məktəbin pedaqoji kollektivi, şagirdlər və qonaqlar iştirak ediblər. Tədbiri giriş sözü ilə açan məktəbin direktoru Bela Cəlilova rəhbərlik etdiyi kollektivin adından nazirliyinin şəxsi heyətini qarşıdan gələn peşə bayramı münasibətilə təbrik edib.

O bildirib ki, bu gün məktəb kollektivi Ermənistanın silahlı qüvvələri tərəfindən işğal olunmuş torpaqlarımızın azad olunması uğrunda mərdlik, igidlik və böyük şücaət göstərmiş, milli təhlükəsizlik orqanlarının əməkdaşı olmuş Eldar Məmmədovun adını həmişə uca tutur, şagirdlər təhsildə əldə etdikləri uğurlarla ona layiq olmağa çalışırlar.

Təhlükəsizlik orqanlarının veteranları Bəxtiyar Süleymanlı və Mirhəbib Seyidov da çıxışlarında milli təhlükəsizlik orqanlarının yarandığı gündən indiyədək keçdiyi çətin və şərəfli tarix barədə danışıblar.

MTN-in Səbayel rayon idarəsinin əməkdaşı Ramiz Məmmədov çıxışında Milli Qəhrəman Eldar Məmmədovun ömür yolu barədə məlumat verib.

Sonra məktəblilərin ifasında Vətəni, xalqımızın qəhrəmanlığını tərənnüm edən şeirlər səslənib. Tədbirin sonunda MTN-in Heydər Əliyev adına Akademiyasının fəaliyyətini əks etdirən "Şücaət və şöhrətin ünvanı" adlı sənədli film nümayiş olunub.

525-ci qəzet.- 2009.- 4 mart.- S.3.