Ağalar Mirzə ayrılığı

Şair, telejurnalist və alim dostum, mərhum Ağalar Mirzənin bu gün ilidir. Həmişə işdən başı açılmayan, ömrünün mənasını çalışıb-vuruşmaqda, axtarışda, yazıb-yaratmaqda görən, elə buna görə də bir qədər özünə qapılan, dostlarla, tanış-bilişlərlə az ünsiyyət saxlayan, üzdən sərt, içdən kövrək bir insan, çiyin yoldaşımız Ağalar Mirzə düz bir il əvvəl qatarımızdan ayrıldı, sıramızdan getdi.

Onun ictimai həyatı bəlkə də şəxsi tərcümeyi-halından daha zəngin oldu. Ömrünü radioya, televiziyaya bağlamışdı bu adam. Fikri-zikri həmişə çəkdiyi və çəkəcəyi verilişlərin yanında idi. Azərbaycanımızın hər qarışını gəzmək, onun özəlliklərini və gözəlliklərini kameranın, yazının yaddaşına köçürmək, vətəni vətən eləyən insanları tanıtmaq, milli dəyərlərimizi üzə çıxartmaq, sözü, sənəti qiymətə mindirmək, eyni zamanda öz peşəsinin incəliklərinə yiyələnmək, işindən zövq almaq - baxın, bunların hamısı rəhmətlik dostumun elədikləri idi.

Ağalar, Novruzun gəlişinə çox sevinərdi. Bu qədim, müqəddəs bayramımızla bağlı kitab yazmışdı, şeirlər qoşmuşdu, yurdumuzun ayrı-ayrı bölgələrində saysız-hesabsız Novruz verilişləri çəkmişdi. Taleyin qisməti beləymiş ki, sevdiyi günlərdə, Novruz çərşənbələri arasında onun ruhu bir qaranquş kimi bədənindən uçub, haradasa özünə yuva qurdu.

Ayrılıqlar içində bir Ağalar Mirzə ayrılığı da var.

O, adını, balalarını, kitablarını, verilişlərini vətən üçün qoyub getdi.

Ruhu şad olsun!   

Əjdər OL

525-ci qəzet.-2009.- 5 mart.- S.7.