Sözlə dolu qəlbin yeni töhfəsi

Hər bir söz adamı əlinə qələm alan gündən vərəqlərə özünü yazır, öz xarakterini, duyğu və düşüncələrini köçürür. Elə bu səbəbdən yaratdığı əsərlər də özünə bənzəyir. Səmimi insan, əqidəli vətəndaş, istedadlı şair Seyid Əsgər Müzəffəroğlunun ruhunun, xasiyyət və hisslərinin hopduğu əsərlərini oxuduqca bu fikrin doğruluğuna şübhə etmirsən.

Şairin "Vətən, əymə başını (1993), "Dağlar dağımdır mənim" (1997), "Allah, bizə kərəm eylə" (2006) kitablarında toplanan bədii nümunələrdə vətənpərvər, xeyirxah bir insanın ürək çırpıntıları, sevinc və nisgili, həyata baxışı, amal və istəyi poetik dillə canlandırılıb.

Müəllifin son illərdə qələmə aldığı şeirlər, "Olduq illər ayrısı" poeması, yozum və düşüncələri daxil edilmiş "Söz sinəmdə qalaq-qalaq" adlı yeni kitabı "Nasir" nəşriyyatı tərəfindən bu yaxınlarda işıq üzü görüb.

Vətəndaş yanğısından, həyat sevgisindən doğan bu bədii nümunələrdə, vətənə, torpağa, xalqa bağlılıq, təmiz məhəbbətə, əxlaqi saflığa çağırış hissləri geniş əksini tapıb.

Kitabın müqəddiməsində göstərildiyi kimi, şairin ürəyi hələ sözlə doludur. Onun sinəsində, hafizəsində, beynində o qədər deyilməmiş, yozulmamış sözlər var ki, yazmaqla qurtaran deyil. Odur ki, həmin sözləri misralara, şeirlərə, aforizmlərə çevirməyə daim can atır, bunun üçün ulu Tanrıdan kömək və fürsət diləyir.

Seyid Əsgər Müzəffəroğluna bu yolda yeni-yeni uğurlar, yaradıcılıq sevincləri arzulayırıq.

Yəhya PAŞAZADƏ

525-ci qəzet.-2009.- 5 mart.-S.7.