Yazıçılar Birliyi nəzdində "Bayatı" kitab mağazası açılıb

Ötən gün Yazıçılar Birliyində (AYB) "Bayatı" kitab mağazasının açılış mərasimi keçirilib. Birliyin sədri xalq yazıçısı Anar açılan mağazanın məqsədinin təkcə kitab satmaq deyil, həm də kitabın təbliği olacağını vurğulayıb: "Yazıçı və şairlərimizin yeni çıxan kitablarının təqdimatı ilə yanaşı, burada müəlliflərin imza günü də keçiriləcək. Mətbuat vasitəsilə ictimaiyyətə məlumat veriləcək və müəyyən olunmuş tarixdə kitablar yazıçının öz imzası ilə satılacaq". Anar bununla kitaba əvvəlki marağın bərpası yönündə ciddi addım atıldığını ifadə edib: "Güman edirik ki, kitab yenə əvvəlki kimi, həyatımızda layiq olduğu yeri tutacaq". Xalq yazıçısı çıxışının sonunda hər kəsi kitabı sevməyə, kitab almağa çağırıb.

Miniatür Kitab Muzeyinin direktoru Zərifə Salahova mağazanın açılmasının dəyərli təşəbbüs olduğunu qeyd edərək son illərdə kitaba marağın azalmasından təəssüf hissilə danışıb.

Millət vəkili, professor Cəmil Həsənli mağazanın açılışının kitaba münasibətin müsbət yöndə dəyişməsinə təkan verəcəyinə, Azərbaycanın ədəbiyyat və mədəniyyətinin təbliğində bu kitab evinin böyük rol oynayacağına əminliyini dilə gətirib.

Mədəniyyət və Turizm Nazirliyinin şöbə müdiri, şair Vaqif Bəhmənli bu mağazanın gələcəkdə bütün kitabsevərlər üçün arzuolunan məkana çevriləcəyinə inandığını deyib. Çıxışlardan sonra AYB sədri Anar rəmzi lenti kəsib və qonaqlar mağazadakı kitablarla tanış olublar.

Sevinc MÜRVƏTQIZI

525-ci qəzet.-2009.- 11 fevral.- S.7.