Həmid Araslının 100 illiyilə bağlı elmi konfrans keçirilib

Azərbaycan Milli Elmlər Akademiyasında (AMEA) böyük ədəbiyyatşünas alim akademik Həmid Araslının 100 illiyinə həsr edilmiş elmi konfrans olub.

AMEA-nın prezidenti akademik Mahmud Kərimov Həmid Araslının həyat və yaradıcılığından ətraflı söz açıb: "Həmid Araslı Gəncə şəhərində görkəmli ruhani alim Məmmədtağı Araszadənin ailəsində doğulub və ilkin təlim-tərbiyəni də ailədə alıb. Gəncə Müəllimlər Gimnaziyasını bitirdikdən sonra Azərbaycan Pedaqoji İnstitutuna daxil olub, həmin vaxtlar qələmini ədəbi yaradıcılıqda sınayıb. İnstitutu bitirəndən sonra taleyini Azərbaycan Elmlər Akademiyası ilə bağlayan tədqiqatçı adi elmi işçidən institut direktoruna qədər şərəfli yol keçib. İlk elmi əsərini 1935-ci ildə nəşr etdirib". M.Kərimov Azərbaycan ədəbiyyatşünaslıq elminin inkişafında H.Araslının müstəsna əməyi olduğunu vurğulayıb və onu "elm cəfakeşi" adlandırıb: "Yarım əsrlik tədqiqatçılıq və ədəbiyyatşünaslıq fəaliyyəti dövründə Həmid Araslı Azərbaycan şifahi xalq ədəbiyyatına dair tədqiqatlar aparıb, xalqımızın ölməz abidəsi olan "Kitabi-Dədə Qorqud"un Azərbaycanda ilk tədqiqatçısı kimi tanınıb. O, böyük Azərbaycan şairi Nizami Gəncəvi, Məhsəti Gəncəvi, Xaqani Şirvani, İmadəddin Nəsimi, Nemətullah Kişvəri, Şah İsmayıl Xətai, Saib Təbrizi, Molla Vəli Vidadi, Molla Pənah Vaqif və başqa şairlər barədə samballı araşdırmaları ilə ədəbiyyatşünaslıq elmimizi zənginləşdirib".

Konfransda AMEA-nın müxbir üzvü, professor Rəfael Hüseynovun, filologiya elmləri namizədi Fəridə Qafqazlının məruzələri dinlənilib, çıxışlarda Həmid Araslı yaradıcılığından, şəxsiyyətindən ətraflı söz açılıb, onun elmi fəaliyyətinin misilsiz dəyərə malik olduğu diqqətə çatdırılıb.

İclas salonunun foyesində iştirakçılara H.Araslının elmi yaradıcılığına həsr olunmuş sərgi də təqdim edilib.

Sevinc MÜRVƏTQIZI

525-ci qəzet.-2009.- 13 mart.- S.7.