Türkiyəli təhsil mütəxəssisləri Naxçıvan Dövlət Universitetində

Türkiyə Cümhuriyyəti Ali Təhsil Şurasının (Yüksək Öyrətim Kurulu - YÖK) nümayəndələrilə Naxçıvan Dövlət Universitetində (NDU) olublar. Qeyd edək ki, səfər NDU-nun rektoru, akademik İsa Həbibbəylinin bu universitetin yenidən Tələbə Seçmə və Yerləşdirmə Sistemi kataloquna daxil edilməsi, diplomların qarşılıqlı tanınması və digər məsələlərin müzakirəsi məqsədilə Yüksək Öyrətim Kurulunun sədri professor Yusif Ziya Özcanı buraya dəvət etməsilə əlaqədar gerçəkləşib.

Heyət ilk öncə NDU-da təhsil alan türk tələbələrin əl işlərindən ibarət rəsm sərgisinə baxıblar. Qonaqlar tanıtma filmi vasitəsilə universitetin tarixi, fəaliyyət strukturu, elm və təhsil sahəsində qazandığı nailiyyətlər, ictimai-mədəni həyatı, idmandakı uğurları barədə bilgi alıblar. Qonaqlara azərbaycanlı və türkiyəli tələbələrin birgə konserti təqdim olunub. İki qardaş xalqın milli musiqisinin tərənnümü NDU-da milli mədəniyyətin təbliğindən, xarici tələbələrin də ictimai fəallığından, mədəni həyatlarının və asudə vaxtlarının yüksək təşkilindən soraq verib.

Növbəti gün YÖK nümayəndələri universiteti gəzərək Memarlıq və mühəndislik fakültəsində sərgilərə baxıb, buradakı fənn kabinələrində olublar. Sonra universitetin olimpiya tipli idman komleksində idmanın inkişafı və tələbələrin sağlam həyat keçirməsi üçün yaradılan şəraitlə tanış olaraq, azərbaycanlı və türkiyəli tələbələrin futbol yarışına azarkeşlik ediblər. Qonaqlar Atatürk Mərkəzində Türkiyə Cümhuriyyətinin tarixinin, iki qardaş xalqın sarsılmaz dostluğunun təbliğindən, internet mərkəzinin fəaliyyətindən razılıqlarını bildiriblər.

Sonra rektorluqda işgüzar görüş keçirilib. Görüşdən əvvəl qonaqlar Universitet Televiziyasının hazırladığı proqramı maraqla izləyiblər. Rektor, akademik İsa Həbibbəyli universitetin fəaliyyəti, beynəlxalq əlaqələri, dünya təhsil sisteminin və müasir informasiya kommunikasiya texnologiyalarının ən son yeniliklərindən bəhrələnməsi barədə ətraflı məlumat verib. O, NDU-nun Avropa Rektorlar Klubunun, Asiya Universitetləri Assosiasiyasının üzvü seçildiyini, Beynəlxalq Sosial Əməkdaşlıq Korporasiyasının "Minilliyin universiteti" adlı beynəlxalq mükafatına layiq görüldüyünü xatırladıb. Rektor təmsil etdiyi ali məktəbin digər dünya universitetləri ilə yanaşı Türkiyənin ali məktəbləri ilə tərəfdaşlığa böyük önəm verdiyini, Türkiyənin Qars Qafqaz, Kocaeli, Fırat, Ankara universitetləri ilə bir çox istiqamətlərdə davamlı əməkdaşlıq etdiyini, birgə elmi istehsalat təcrübələrinin keçirildiyini, beynəlxalq elmi konfransların və simpoziumların təşkil olunduğunu söyləyib. Millət vəkili, akademik İsa Həbibbəyli universitetdə bir neçə türkiyəli tələbənin təhsil aldığını bildirərək, iki il əvvəl türk tələbələrin bu ali məktəbə qəbul edilməsinin dayandırılmasının əsassız olduğunu vurğulayıb, qarşılıqlı tələbə mübadiləsinin Azərbaycan-Türkiyə dostluğunun möhkəmləndirilməsində və bu dostluğun gənclər arasında təbliğində böyük əhəmiyyət kəsb etdiyini dilə gətirib.

YÖK sədrinin müavini professor İzzet Özgenc səfərin məqsədinin Naxçıvan Dövlət Universiteti ilə yaxından tanışlıq, türkiyəli tələbələrin buraya qəbulunun dayandırılmasının səbəblərini obyektiv şəkildə araşdırmaq olduğunu bildirib. YÖK-ün İcra Şurasının üzvü professor M.A.Yekta Saraç, Baş Məclis üzvü professor Ənvər Həsənoğlu, Diplomların Qarşılıqlı Tanınması bölməsinin müdiri Hülya Pişirici, Qars Qafqaz Universitetinin rektoru Əbumüslüm Güven türk tələbələrinin təhsili və yaşayışı ilə bağlı suallar veriblər.

Görüşdə iştirak edən Tələbə Qəbulu üzrə Dövlət Komissiyasının sədri Məleykə Abbaszadə Naxçıvan Dövlət Universitetində türk tələbələrinin gələcəkdə təhsil almasına əngəl olacaq heç bir səbəb olmadığını, əksinə burada hər cür şərait yaradıldığını açıqlayıb.

İzzet Özgenc "Zaman" qəzetinin əməkdaşı Attik Mezluma verdiyi müsahibəsində bildirib ki, əgər araşdırmalar türkiyəli tələbələrin Naxçıvan Dövlət Universitetində təhsil almasına heç bir ciddi maneə olmadığını təsdiq edərsə, bundan sonra türk tələbələrin buraya qəbul olunmasına razılıq veriləcək. Qonaqlar hərarətli qarşılanmaya görə səmimi minnətdarlıqlarını bildiriblər.

Sonra YÖK nümayəndələrinin türk tələbələrlə görüşü keçirilib.

Mehriban SULTAN,

Naxçıvan Dövlət Universiteti

mətbuat şöbəsinin müdiri

525-ci qəzet.- 2009.- 13 mart.- S.7.